திமுகவிலிருந்து நீக்கப்பட்ட முன்னாள் மத்திய அமைச்சர் மு.க. அழகிரியின் ஆதரவாளர்கள், தற்போது அதிமுகவில் இணைய வாய்ப்புள்ளதாக வெளியாகி இருக்கும் தகவல் தமிழக அரசியலில் பெரும் பரபரப்பை ஏற்படுத்தியுள்ளது. நீண்ட காலமாக திமுகவில் மீண்டும் இணைவதற்கு அவர்கள் முயற்சி செய்தும், தலைமை தரப்பிலிருந்து சாதகமான பதில் கிடைக்காததே இந்த அதிரடி முடிவுக்குக் காரணம் என்று கூறப்படுகிறது.
கடந்த சில மாதங்களுக்கு முன்பு முதல்வர் மு.க. ஸ்டாலின் மதுரைக்குச் சென்றிருந்தபோது, அழகிரியின் தீவிர ஆதரவாளரான மன்னன் உள்ளிட்டோர் தங்களை மீண்டும் கட்சியில் சேர்த்துக்கொள்ளக் கோரி கடிதம் வழங்கினர். இருப்பினும், திமுகவின் அடுத்தகட்ட முக்கியத் தலைவர்கள் சிலர் இவர்களின் வருகையை விரும்பவில்லை எனக் கூறப்படுகிறது. இதனால் ‘பச்சைக்கொடி’ காட்டப்படாத நிலையில், அவர்கள் கடும் அதிருப்தியில் இருப்பதாகத் தெரிகிறது.
இதற்கிடையே, அழகிரியின் மற்றொரு ஆதரவாளரான கார்த்திகேயன் சமீபத்தில் விஜய் தலைமையிலான தமிழக வெற்றிக் கழகத்தில் இணைந்தார். ஆனால், சீனியர் நிர்வாகிகள் பலர் புதிய கட்சியான தவெக-வில் இணைவதை விட, அனுபவம் வாய்ந்த அதிமுகவில் இணைவதே அரசியல் ரீதியாகச் சரியாக இருக்கும் என கருதுகின்றனர். இதற்காக அதிமுக தலைமையுடன் அவர்கள் ரகசியப் பேச்சுவார்த்தை நடத்தி வருவதாகவும் தகவல்கள் கசிகின்றன.
மதுரை மற்றும் தென் மாவட்டங்களில் மு.க. அழகிரிக்கு இன்றும் ஒரு குறிப்பிட்ட செல்வாக்கு உள்ளது. அவரது ஆதரவாளர்கள் அதிமுகவில் இணைந்தால், அது வரவிருக்கும் 2026 சட்டமன்றத் தேர்தலில் தென் மண்டல திமுகவிற்குப் பெரும் சவாலாக அமையலாம். விரைவில் இதற்கான அதிகாரப்பூர்வ அறிவிப்புகள் வெளியாகும் என எதிர்பார்க்கப்படும் நிலையில், மதுரை அரசியல் களம் தற்போது சூடுபிடிக்கத் தொடங்கியுள்ளது.