ஓமன் கடலில் நடுக்கம்.. நடுவானில் பாய்ந்த ஏவுகணை.. மரணத்தின் விளிம்பிலிருந்து மீண்ட 21 இந்தியர்கள்… உச்சக்கட்ட பதற்றம்….!

மத்திய கிழக்கில் அமெரிக்கா மற்றும் ஈரான் நாடுகளுக்கு இடையே நீடித்து வரும் மோதலால், உலகிலேயே மிக முக்கியமான கடல் வழித்தடங்களில் ஒன்றான ஹார்முஸ் நீரிணைப் பகுதியில் பெரும் பதற்றம் நிலவி வருகிறது. இந்தச் சூழலில், ஓமன் நாட்டின் சோஹர் துறைமுகத்திற்கு வடகிழக்கே சுமார் 20 கடல் மைல் தொலைவில் பயணித்துக் கொண்டிருந்த ‘செட்டபெல்லோ’ (Settabello) என்ற எண்ணெய் டாங்கர் கப்பல் மீது திடீரென ஏவுகணைத் தாக்குதல் நடத்தப்பட்டுள்ளது. பலாவு நாட்டின் கொடியுடன் பயணித்த இந்தக் கப்பலின் எஞ்சின் அறையை ஏவுகணை தாக்கியதில், கப்பலில் பெரும் தீ விபத்து ஏற்பட்டு சர்வதேச அளவில் பெரும் பரபரப்பை ஏற்படுத்தியுள்ளது.

இந்தக் கப்பலில் மொத்தம் 28 ஊழியர்கள் பணியாற்றி வந்த நிலையில், அவர்களில் 24 பேர் இந்தியர்கள் என்பது குறிப்பிடத்தக்கது. தாக்குதல் நடத்தப்பட்ட உடனே கப்பலில் இருந்து அபாய சிக்னல் அனுப்பப்பட்டதைத் தொடர்ந்து, மீட்புப் பணிகள் முடுக்கிவிடப்பட்டன. இதில் சிக்கிய 24 இந்தியர்களில் 21 மாலுமிகள் பத்திரமாக மீட்கப்பட்டுள்ளதாக மத்திய வெளியுறவு அமைச்சகம் அதிகாரப்பூர்வமாகத் தெரிவித்துள்ளது. எனினும், துரதிர்ஷ்டவசமாக 3 இந்திய மாலுமிகள் இன்னும் கண்டுபிடிக்கப்படவில்லை. மாயமான அந்த 3 இந்தியர்களைத் தேடும் பணியில் ஓமனில் உள்ள இந்தியத் தூதரகம் அந்நாட்டு அதிகாரிகளுடன் இணைந்து தீவிரமாக ஈடுபட்டு வருகிறது.

பிரிட்டிஷ் கடல்சார் பாதுகாப்பு நிறுவனமான ‘ஆம்பிரே’ இந்தத் தாக்குதலை ஆய்வு செய்து சில முக்கியத் தகவல்களை வெளியிட்டுள்ளது. ஈரான் தொடர்பான கப்பல் போக்குவரத்தைத் தடுப்பதற்காக அமெரிக்கக் கடற்படை அங்கு ஒரு முற்றுகையை நடத்தியுள்ளது. இதன் ஒரு பகுதியாகவே இந்தத் தாக்குதல் நடந்திருக்கலாம் என்று கருதப்படுகிறது. வியப்பூட்டும் விதமாக, கப்பலின் பின்புறத்தைத் தாக்குவதற்கு முன்னதாக, ஊழியர்களைக் கப்பலின் முன்பகுதிக்குச் செல்லுமாறு அறிவுறுத்திவிட்டு, அதன் பிறகே எஞ்சின் அறை தாக்கப்பட்டுள்ளது. எனினும், இந்தத் தாக்குதலைத் துல்லியமாக நடத்தியது அமெரிக்காவா அல்லது ஈரானா என்பது குறித்து இதுவரை எந்தவொரு அதிகாரப்பூர்வ அறிவிப்பும் வெளியாகவில்லை.

உலகில் அதிக எண்ணிக்கையிலான மாலுமிகளைக் கொண்ட நாடுகளில் ஒன்றாக இந்தியா திகழ்வதால், சர்வதேச வணிகக் கப்பல்களில் பணியாற்றும் ஏராளமான இந்தியர்கள் இந்த ஹார்முஸ் ஜலசந்தி மோதலில் சிக்கி தவித்து வருகிறார்கள். ஏற்கனவே கடந்த மே மாத இறுதியில் மஸ்கட் அருகேயும், ஆண்டின் தொடக்கத்தில் ஓமனின் காசாப் துறைமுகம் அருகேயும் நடத்தப்பட்ட தாக்குதல்களிலும் இந்தியர்கள் சிக்கியிருந்தது குறிப்பிடத்தக்கது. தற்போது நடந்துள்ள இந்த கொடூரத் தாக்குதலுக்கு இந்தியா தனது கடுமையான கண்டனங்களைப் பதிவு செய்துள்ளதோடு, தனது குடிமக்களைப் பாதுகாப்பதற்கான முயற்சிகளையும் தீவிரப்படுத்தியுள்ளது.