ஆசையாக சாப்பிட்ட மீன் குழம்பு… சில நிமிடங்களில் நேர்ந்த கொடூரம்… 32 வயது வாலிபருக்கு நேர்ந்த கதி…. கதறிய குடும்பத்தினர்…!

விழுப்புரம் அருகே உள்ள பக்கமேடு கிராமத்தைச் சேர்ந்த மினிவேன் ஓட்டுநரான ரஞ்சித்குமார் (32) என்பவர், வீட்டில் மீன் குழம்பு சாப்பிட்ட சில மணி நேரங்களிலேயே கடுமையான வயிற்று வலி மற்றும் வாந்தி மயக்கம் ஏற்பட்டு பரிதாபமாக உயிரிழந்தார். இவருக்கு மோகனபிரியா என்ற மனைவியும், மூன்று வயதில் ஒரு மகனும், ஒரு வயதில் ஒரு பெண் குழந்தையும் உள்ளனர். கடந்த சில நாட்களுக்கு முன்பு வீட்டில் சமைக்கப்பட்ட ‘கிளிச்சை மீன்’ குழம்பை ரஞ்சித்குமார் ஆசையோடு மதியமும் இரவும் சாப்பிட்டுள்ளார். இரவு உணவு முடிந்த சிறிது நேரத்திலேயே அவருக்கு ஏற்பட்ட கடுமையான உடல்நலக் குறைவு, அந்த குடும்பத்தையே நிலைகுலையச் செய்துள்ளது.

வயிற்று வலியால் துடித்த ரஞ்சித்குமாரை அவரது குடும்பத்தினர் அக்கம் பக்கத்தினரின் உதவியோடு உடனடியாக வளவனூர் அரசு மருத்துவமனைக்கு சிகிச்சைக்காக அழைத்துச் சென்றனர். ஆனால், அங்கு அவரைப் பரிசோதித்த அவசரப்பிரிவு மருத்துவர்கள், ரஞ்சித்குமார் மருத்துவமனைக்கு வரும் வழியிலேயே ஏற்கனவே இறந்துவிட்டதாகக் கூறி அதிர்ச்சியளித்தனர். இதனால் மருத்துவமனை வளாகத்திலேயே அவரது குடும்பத்தினர் கதறி அழுதது அங்கிருந்தவர்களை பெரும் சோகத்தில் ஆழ்த்தியது. இச்சம்பவம் குறித்து வளவனூர் காவல் நிலைய போலீசாருக்கு உடனடியாகத் தகவல் தெரிவிக்கப்பட்டது.

இது குறித்து வழக்குப் பதிவு செய்துள்ள காவல்துறையினர் தீவிர விசாரணை மேற்கொண்டு வருகின்றனர். உயிரிழந்த ரஞ்சித்குமாருக்குத் தொடர்ந்து மது அருந்தும் பழக்கம் இருந்ததாகவும், இதனால் அவர் கடந்த சில காலமாகவே கடுமையான வயிற்று வலியால் அவதிப்பட்டு வந்ததாகவும் கூறப்படுகிறது. எனவே, அவரது மரணத்திற்கு அவர் சாப்பிட்ட மீன் குழம்பில் ஏற்பட்ட உணவு நச்சுக் கலப்பு காரணமா, அல்லது மதுப்பழக்கத்தால் ஏற்கனவே பாதிக்கப்பட்டிருந்த அவரது உள் உறுப்புகளில் ஏற்பட்ட திடீர் கோளாறு காரணமா என்ற கோணத்தில் போலீசார் விசாரணையை முடுக்கிவிட்டுள்ளனர்.