தமிழக அரசு மருத்துவமனைகளில் நடைபெறும் முறைகேடுகள் மற்றும் தவறுகளைக் கண்காணித்து சுட்டிக்காட்ட நேற்றுதான் சிறப்பு நோடல் அதிகாரிகள் நியமிக்கப்பட்டனர். இந்த அதிரடி நடவடிக்கை வெளியான சில மணி நேரங்களிலேயே, மதுரை அரசு ராஜாஜி மருத்துவமனை வளாகத்தில் ஒரு அதிர்ச்சிகரமான சம்பவம் அரங்கேறியுள்ளது. மருத்துவமனை பிணவறை ஊழியர்கள் சிலர் அங்கு கஞ்சா புகைப்பதாக நேற்று ரகசியத் தகவல் வெளியான நிலையில், இன்று அதே பிணவறைப் பகுதியைக் குறிவைத்து போலீஸார் தீவிர சோதனை நடத்தினர்.
இதில், அங்கு மறைத்து வைக்கப்பட்டிருந்த சுமார் 12 கிலோ கஞ்சா மற்றும் 50 நைட்ரோசெபாம் போதை மாத்திரைகளை போலீஸார் அதிரடியாகப் பறிமுதல் செய்துள்ளனர். இந்த சட்டவிரோத போதைப்பொருள் கடத்தல் மற்றும் விற்பனை தொடர்பாக மூன்று பேரை போலீஸார் உடனடியாகக் கைது செய்து விசாரித்து வருகின்றனர். நோயாளிகளைக் குணப்படுத்தும் அரசு மருத்துவமனை வளாகத்திற்குள்ளேயே, அதுவும் பிணவறையின் அருகிலேயே இவ்வளவு பெரிய அளவில் போதைப்பொருட்கள் பிடிபட்டிருப்பது பொதுமக்கள் மத்தியிலும் மருத்துவ வட்டாரத்திலும் பெரும் அதிர்ச்சியையும் பரபரப்பையும் ஏற்படுத்தியுள்ளது.