திருச்செந்தூர் போறீங்களா…? இந்த முறைப்படி கும்பிட்டா தான் முழு பலன் கிடைக்கும்…! வேலவன் அருளும் வழிபாட்டு ரகசியங்கள்…!!

முருகப்பெருமானின் அறுபடை வீடுகளில் இரண்டாம் படை வீடான திருச்செந்தூருக்குச் செல்பவர்கள், அங்குள்ள வழிபாட்டு முறைகளைச் சரியாகப் பின்பற்றுவது மிகுந்த பலனைத் தரும். வீட்டிலிருந்து கிளம்பும்போதே குலதெய்வத்தை வணங்கி, ஒரு ரூபாய் நாணயத்தை மஞ்சள் துணியில் முடிந்து எடுத்துச் செல்ல வேண்டும்.

அங்குச் சென்றதும் முதலில் கடலில் நீராடிவிட்டு, பின்னர் முருகப்பெருமான் தனது வேலால் உருவாக்கிய புனிதமான ‘நாழிக்கிணற்றில்’ குளிக்க வேண்டும். அதன் பிறகு ஈர உடையுடன் தரிசனம் செய்யாமல், உலர்ந்த ஆடைகளை அணிந்துகொண்டு துண்டுகை விநாயகரை வணங்கித் தேங்காய் உடைத்த பின்னரே மூலவரைத் தரிசிக்கச் செல்ல வேண்டும்.

கோவிலுக்குள் மூலவர் சுப்பிரமணியரையும், சண்முகரையும் மனமுருக வேண்டி வழிபட வேண்டும். அங்கு வழங்கப்படும் பன்னீர் இலை பிரசாதம் சகல வியாதிகளையும், தோஷங்களையும் நீக்கவல்லது. மேலும், கோவிலில் உள்ள குரு பகவான் சன்னதியில் நெய் தீபம் ஏற்றி மஞ்சள் வஸ்திரம் சாற்றி வழிபடுவது பொருளாதாரச் சிக்கல்களைத் தீர்க்கும்.

குழந்தை வரம் வேண்டுவோர் வள்ளிக் குகையில் தொட்டில் கட்டிப் பிரார்த்தனை செய்யலாம். இறுதியாகக் கொண்டு சென்ற நாணயத்தை அங்குள்ள மரத்தில் கட்டி வேண்டிவிட்டு, வேண்டுதல் நிறைவேறிய பின் உண்டியலில் காணிக்கைச் செலுத்துவது இத்தலத்தின் முக்கிய மரபாகும்.