“வாடகை வீட்டுக்கு வந்தவங்க நீங்க”…. “உண்மைய சொன்னா கசக்கும்”…. செங்கோட்டையன் மூக்கை உடைத்த மதிமுக துணைப் பொதுச்செயலாளர்….!

அமைச்சர் கே.ஏ. செங்கோட்டையனின் சமீபத்திய பேச்சு தமிழக அரசியல் களத்தில் பெரும் விவாதத்தை ஏற்படுத்தியுள்ளது. திமுக கூட்டணியில் இருந்த கட்சிகள் தவெக பக்கம் சாய்வதாகவும், குறிப்பாக மதிமுகவின் தற்போதைய நிலையைச் சுட்டிக்காட்டி “அதிமுகவும் மதிமுகவைப் போல மாறிவிடும்; விரைவில் சில கட்சிகளில் தலைவர்கள் மட்டுமே இருப்பார்கள், தொண்டர்கள் இருக்க மாட்டார்கள்” என்றும் அவர் கடுமையாக விமர்சித்திருந்தார். அமைச்சரின் இந்த உரை மதிமுக மற்றும் அதிமுக தொண்டர்களிடையே பெரும் அதிர்ச்சியையும் கொந்தளிப்பையும் உருவாக்கியது.

அமைச்சரின் இந்த விமர்சனத்திற்குப் பதிலடி கொடுக்கும் வகையில், காஞ்சிபுரத்தில் மதிமுக மாவட்டச் செயலாளர் கருணாகரன் தலைமையில் மாவட்ட செயல்வீரர்கள் கூட்டம் நடைபெற்றது. இக்கூட்டத்தில் சிறப்பு அழைப்பாளராகப் பங்கேற்ற மதிமுக துணைப் பொதுச்செயலாளர் சு. ஜீவன், கட்சியின் வளர்ச்சிப் பணிகள் குறித்தும், எதிர்வரும் அரசியல் சவால்களை எதிர்கொள்வது குறித்தும் தொண்டர்களுக்கு முக்கிய ஆலோசனைகளை வழங்கினார். கூட்டத்தின் இறுதியில் செய்தியாளர்களைச் சந்தித்த அவரிடம், அமைச்சர் செங்கோட்டையனின் கருத்து குறித்து கேள்விகள் எழுப்பப்பட்டன.

செய்தியாளர்களின் கேள்விகளுக்கு மிகவும் காரசாரமாகப் பதிலளித்த சு. ஜீவன், “உண்மையைச் சொன்னால் சிலருக்குக் கசக்கும், ஆனால் நான் உண்மையைத்தான் பேசுவேன்” என்று கூறி தனது கண்டனத்தைப் பதிவிட்டார். “தமிழக வெற்றி கழகம் தொடங்கப்பட்டபோது செங்கோட்டையனோ அல்லது நாஞ்சில் சம்பத்தோ அதில் இல்லை. அவர்கள் வேறு இடங்களில் அரசியல் குடும்பம் நடத்திவிட்டு, இப்போது தவெகவிற்கு வாடகை வீட்டிற்கு வந்திருப்பவர்கள்” என்று மிகக் கடுமையான வார்த்தைகளால் விமர்சித்தார்.

தொடர்ந்து பேசிய அவர், மாற்றுச் முகாம்களில் இருந்து வந்தவர்களின் அரசியல் தரம் இப்படித்தான் இருக்கும் என்று சாடினார். “நாளைக்கு தவெகவின் நிலையில் ஏதேனும் சறுக்கல் ஏற்பட்டால், இவர்கள் அடுத்ததாக வேறு ஒரு வாடகை வீட்டிற்குச் சென்று விடுவார்கள். எனவே, இத்தகைய அரசியல்வாதிகளின் பேச்சை நாங்கள் ஒரு பொருட்டாகவே மதிப்பதில்லை; அவர்களைப் பற்றி யோசித்து நேரத்தை வீணடிக்கத் தேவையில்லை” என்று கூறி, செங்கோட்டையனின் விமர்சனத்திற்கு முற்றுப்புள்ளி வைத்தார்.