பிஹார் மாநிலம் சசாரம் ரயில் சந்திப்பில் (ஜங்சன்) நின்றிருந்த பயணிகள் ரயில் ஒன்றில் இன்று காலை பயங்கர தீ விபத்து ஏற்பட்டது. காலை 6 மணி அளவில் பிளாட்பார்மில் நிறுத்தி வைக்கப்பட்டிருந்த அந்த ரயிலில் திடீரென தீப்பிடித்து எரியத் தொடங்கியது. இந்த விபத்தில் ரயிலின் இரண்டு பெட்டிகள் முற்றிலும் தீக்கிரையாகி சேதமடைந்தன. அதிர்ஷ்டவசமாக, விபத்து நடந்த சமயத்தில் ரயிலில் பயணிகள் யாரும் இல்லாததால் பெரும் உயிர்ச் சேதம் தவிர்க்கப்பட்டது.
நேற்றுதான் மத்திய பிரதேசத்தில் சென்று கொண்டிருந்த புகழ்பெற்ற ராஜ்தானி எக்ஸ்பிரஸில் ஒரு தீ விபத்து ஏற்பட்டிருந்தது. அந்த அதிர்ச்சி விலகுவதற்குள், அடுத்த நாளே இன்று பிஹாரில் மற்றொரு ரயிலும் தீ விபத்தில் சிக்கியிருப்பது ரயில் பயணிகள் மத்தியிலும், பொதுமக்களிடையேயும் பெரும் அதிர்ச்சியையும் கவலையையும் ஏற்படுத்தியுள்ளது. தொடரும் இந்த ரயில் தீ விபத்துகள் தற்செயலானவையா அல்லது ஏதேனும் தொழில்நுட்பக் கோளாறா என்பது குறித்து அதிகாரிகள் தீவிர விசாரணை நடத்தி வருகின்றனர்.