நெட்டிசன்களைக் கவர்ந்த ‘சூட்-பூட்’ செஃப்.. 19 வயது சீன இளைஞரின் மாஸ் பிசினஸ்..! ஒரே ஒரு ஐடியாவால் மாறிய வாழ்க்கை…!!

சீனாவின் ஷான்டாங் மாகாணத்தில் உள்ள யான்டாய் நகரின் இரவு சந்தையில், 19 வயது இளைஞரான ‘லூ’ (Lu) என்பவர் விற்கும் ஃபிரைடு ரைஸ் சமூக ஊடகங்களில் பெரும் வைரலாகி வருகிறது. பொதுவாக தெருவோர வியாபாரிகள் சாதாரண உடைகளையே அணிவார்கள். ஆனால், இந்த இளைஞர் முறையான கோட்-சூட் அணிந்து மிகவும் ஸ்டைலாக ஃபிரைடு ரைஸ் சமைத்து வாடிக்கையாளர்களைக் கவர்ந்து வருகிறார். கூட்டத்தில் தான் தனித்துத் தெரிய வேண்டும் என்பதற்காக, தனது 17 வயதில் தொடங்கிய இந்த உணவுக் கடையில் அவர் புகுத்திய இந்த வித்தியாசமான பாணி, அவரை ஒரே இரவில் இணைய உலக நட்சத்திரமாக மாற்றியுள்ளது.

லூ வெறும் உணவை மட்டும் சமைப்பதில்லை, மாறாக அதை ஒரு கலை நிகழ்ச்சியைப் போல மாற்றியுள்ளார். அதிவேகமாக கடாயைச் சுழற்றுவது, சமைக்கும் போது கேமராவைப் பார்த்து கண் சிமிட்டுவது, காற்றில் முட்டையைத் தூக்கிப் பிடிப்பது என சீன செஃப்களைப் போல பல ஸ்டைலான சமையல் அசைவுகளை வெளிப்படுத்துகிறார். இந்தத் தனித்துவமான பாணியை வீடியோவாக எடுத்து சமூக ஊடகங்களில் அவர் பகிர்ந்து வருவதால், அவருக்கு ஆயிரக்கணக்கான பின்தொடர்பவர்கள் உருவாகியுள்ளனர். தற்போது அவரது கடை வெறும் உணவு உண்ணும் இடமாக மட்டுமல்லாமல், மக்களைக் கவரும் ஒரு பொழுதுபோக்கு மையமாகவும் மாறியுள்ளது.

தினமும் மாலை 5 மணி முதல் இரவு 11:30 மணி வரை செயல்படும் இவரது கடையில் வாடிக்கையாளர்கள் நீண்ட வரிசையில் காத்திருக்கின்றனர். ஒரு நாளைக்கு 200-க்கும் மேற்பட்ட ஃபிரைடு ரைஸ் தட்டுகளை விற்கும் இவர், இதன் மூலம் மாதம் ஒன்றுக்கு சுமார் 50,வாண யுவான் (இந்திய மதிப்பில் சுமார் 7 லட்சம் ரூபாய்) வரை வருவாய் ஈட்டுகிறார். அனைத்துச் செலவுகளும் போக மாதத்திற்கு 20,000 யுவான் (சுமார் 2.3 லட்சம் ரூபாய்) லாபமாகச் சேமிக்கும் லூ, இவ்வளவு சிறிய வயதிலேயே தனது குடும்பத்தில் அதிக வருமானம் ஈட்டும் நபராக மாறியுள்ளார். இவருக்கு உதவியாக இவரது தந்தையும் இந்த வியாபாரத்தில் ஈடுபட்டு வருகிறார்.