“தடுக்க முயன்ற மாணவிக்கு பளார்…” இடுக்கு சந்தில் தள்ளி ஈவ்-டீசிங்  செய்த நபர்… கொந்தளிப்பை ஏற்படுத்திய வீடியோ வைரல்…!!

உத்தரப் பிரதேச மாநிலம் முசாஃபர்நகர் மாவட்டம் புதானா பகுதியில், பள்ளிக்குச் சென்று கொண்டிருந்த மாணவி ஒருவரைப் பின்தொடர்ந்து சென்ற நபர், இடுக்குச் சந்தில் தள்ளி ஈவ்-டீசிங் செய்ததோடு, எதிர்த்துப் பேசியதால் அவரை அறைந்த சம்பவம் தொடர்பான சிசிடிவி காட்சிகள் வெளியாகிப் பெரும் பரபரப்பை ஏற்படுத்தியுள்ளது.

கருப்பு நிறச் சட்டை அணிந்த நபர் ஒருவர், வீதியில் நடந்து சென்ற பள்ளி மாணவியைப் பின்தொடர்ந்து சென்று, அவரை வலுக்கட்டாயமாக ஒரு சந்திற்குள் தள்ளித் தொல்லை கொடுத்துள்ளார். அந்த மாணவி அதைத் தடுத்து நிறுத்த முயன்றபோது, ஆத்திரமடைந்த அந்த நபர் மாணவியின் முகத்தில் பலமாக அறைந்துள்ளார். இதனால் பயந்துபோன அந்த மாணவி அமைதியாக அங்கிருந்து நடந்து சென்றுள்ளார்.

இந்தச் சம்பவம் அங்கிருந்த சிசிடிவி கேமராவில் பதிவாகி இணையத்தில் வைரலானதைத் தொடர்ந்து, முசாஃபர்நகர் காவல்துறையினர் இது தொடர்பாக வழக்குப் பதிவு செய்துள்ளனர். வீடியோ காட்சிகளின் அடிப்படையில் அந்த நபரை அடையாளம் கண்டு கைது செய்யப் புதானா காவல்துறையினர் தீவிர நடவடிக்கை மேற்கொண்டு வருகின்றனர்.