கொடைக்கானல் போறீங்களா?… திடீரென பொங்கி எழுந்த அருவி… வெள்ளத்தில் மூழ்கிய பாதை… நடுவழியில் சிக்கிய நூற்றுக்கணக்கான வாகனங்கள்…!!

தமிழகத்தின் பிரபல சுற்றுலாத் தலமான கொடைக்கானலில் பெய்து வரும் கனமழை காரணமாக, முக்கிய நுழைவுப் பகுதியான வெள்ளி நீர்வீழ்ச்சி அருகே திடீரென காட்டாற்று வெள்ளம் பெருக்கெடுத்து ஓடியது. மலைப்பகுதியிலிருந்து சீறிப்பாய்ந்து வந்த சேற்று கலந்த வெள்ளநீர் பிரதான சாலையை முழுமையாக மூழ்கடித்துச் சென்றதால், அவ்வழியாகச் செல்ல முயன்ற பேருந்துகள் மற்றும் கார்கள் மேற்கொண்டு நகர முடியாமல் ஆங்காங்கே நிறுத்தப்பட்டன.

சுமார் இரண்டு மணி நேரத்திற்கும் மேலாகப் போக்குவரத்து முற்றிலுமாகத் துண்டிக்கப்பட்டதால், மலைப்பாதையிலுள்ள சாலையோரக் கடைகள் அருகே வாகனங்கள் நீண்ட வரிசையில் அணிவகுத்து நின்றன. இதனால் வார விடுமுறையைக் கழிக்க வந்த சுற்றுலாப் பயணிகளும், உள்ளூர் பொதுமக்களும் கடும் சிரமத்திற்கு ஆளாகினர். வெள்ளம் சாலையைக் கடந்து ஆர்ப்பரித்துச் செல்லும் இந்த அதிர்ச்சியூட்டும் காட்சிகள் சமூக வலைத்தளங்களில் வெளியாகி வேகமாகப் பரவி வருகின்றன.

வடகிழக்குப் பருவமழை தீவிரமடைந்துள்ள நிலையில், வானிலை ஆய்வு மையம் கனமழை எச்சரிக்கை விடுத்துள்ள மாவட்டங்களில் பயணங்களைத் தவிர்க்குமாறும், அதிகாரப்பூர்வ வானிலை முன்னறிவிப்புகளைக் கவனித்து அதற்கேற்பப் பயணங்களைத் திட்டமிடுமாறும் இணையவாசிகள் மற்றும் அதிகாரிகள் சுற்றுலாப் பயணிகளுக்கு அறிவுறுத்தி வருகின்றனர்.