சென்னை சூளைமேடு பகுதியில் நேபாள நாட்டைச் சேர்ந்த கேஷப் குமார் போகடி என்ற வாலிபர் வசித்து வந்தார். இவர் தனது காதலியின் பிறந்தநாள் விழாவில் கலந்துகொண்டு அளவுக்கு அதிகமாக மது அருந்தியுள்ளார். மதுபோதை உச்சத்திற்குச் சென்ற நிலையில், அவர் கட்டுப்பாட்டை இழந்து அருகில் இருந்த பக்கத்து வீட்டுக்குள் அத்துமீறி நுழைந்துள்ளார். அங்கு உறங்கிக் கொண்டிருந்த 48 வயது பெண்ணுக்குப் பாலியல் ரீதியாகக் கடும் தொந்தரவு கொடுத்துள்ளார். இதனால் திடுக்கிட்டு எழுந்த அப்பெண் கூச்சலிடவே, அக்கம் பக்கத்தினர் உடனடியாகத் திரண்டு வந்து அந்த வாலிபரைப் பிடித்துத் தர்ம அடி கொடுத்தனர்.
இச்சம்பவம் குறித்துச் சூளைமேடு காவல் நிலையத்திற்கு உடனடியாகத் தகவல் தெரிவிக்கப்பட்டது. சம்பவ இடத்திற்கு விரைந்து வந்த காவல்துறையினர், பாலியல் அத்துமீறலில் ஈடுபட்ட நேபாள வாலிபர் கேஷப் குமார் போகடியை வழக்குப்பதிவு செய்து கைது செய்தனர். பின்னர், அவரை நீதிமன்றத்தில் ஆஜர்படுத்திச் சிறையில் அடைத்தனர். மதுபோதையில் அத்துமீறி நுழைந்து பெண் மீது பாலியல் அத்துமீறலில் ஈடுபட்ட இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.