கூட்டணி கணக்குகள் தவிடு பொடி…. தவெக-வை கழற்றிவிட்டு திமுக பக்கம் தாவிய மல்லை சத்யா…. செம குஷியில் ஸ்டாலின்…!

மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் அக்டோபர் 6-ஆம் தேதி நடைபெறவுள்ள நிலையில், தமிழக அரசியல் களம் பெரும் விறுவிறுப்பை அடைந்துள்ளது. அதிமுக சார்பில் தேர்ந்தெடுக்கப்பட்ட சட்டமன்ற உறுப்பினர்கள் தங்களது பதவிகளை ராஜினாமா செய்துவிட்டு தவெகவில் இணைந்ததால் காலியான இந்த தொகுதிகளுக்கு இடைத்தேர்தல் அறிவிக்கப்பட்டது. இச்சூழலில், மதுராந்தகத்தில் பரந்தாமனையும், தாராபுரத்தில் சுகன்யாவையும் திமுக வேட்பாளர்களாக அறிவித்து தேர்தல் பணிகளைத் தீவிரப்படுத்தியுள்ளது.

இந்த அரசியல் சூழலில், மதிமுகவிலிருந்து விலகி ‘திராவிட வெற்றிக் கழகம்’ என்ற அமைப்பை நடத்தி வரும் மல்லை சத்யா, அறிவாலயத்தில் திமுக தலைவர் மு.க.ஸ்டாலினை நேரில் சந்தித்து திமுகவுக்குத் தனது ஆதரவை அதிகாரப்பூர்வமாகத் தெரிவித்துள்ளார். மக்கள் தங்களின் வாக்களித்த விரல் மை அழிவதற்கு முன்பாகவே சுயலாபத்திற்காகப் பதவியை ராஜினாமா செய்ததை வாக்காளர்கள் ஒருபோதும் ஏற்றுக்கொள்ள மாட்டார்கள் என்று அவர் சாடியுள்ளார்.

மதுராந்தகம் தொகுதியில் போட்டியிடும் மாற்று வேட்பாளர் மீது மக்களிடையே கடும் எதிர்ப்பும் அதிருப்தியும் நிலவி வருவதாகச் சுட்டிக்காட்டிய மல்லை சத்யா, திமுக வேட்பாளர் பரந்தாமன் மிக மகத்தான வெற்றியைப் பெறுவார் எனத் நம்பிக்கை தெரிவித்துள்ளார். மேலும், சட்டப்பேரவையின் தற்போதைய ஜனநாயகப் போக்கை சுட்டிக்காட்டி, ஜனநாயகத்தைக் காக்கவும் தங்களது ஆதரவை திமுகவுக்கு வழங்கி இருப்பதாக அவர் விளக்கமளித்தார்.

தற்போதைய அரசியல் சூழலில் தவெக கூட்டணியில் மதிமுக அங்கம் வகிக்கும் நிலையில், மதிமுகவிலிருந்து பிரிந்து வந்த மல்லை சத்யா தவெக கூட்டணிக்கு எதிராக திமுகவை ஆதரிப்பது அரசியல் வட்டாரத்தில் பெரும் கவனத்தைப் பெற்றுள்ளது. ராஜினாமா செய்தவர்களுக்கே மீண்டும் போட்டியிட வாய்ப்பு வழங்கப்பட்டுள்ள பின்னணியில், மல்லை சத்யாவின் இந்த ஆதரவு திமுகவின் வெற்றி வாய்ப்பை மேலும் வலுப்படுத்தியுள்ளதாகக் கருதப்படுகிறது.