பிடிஆர்-ஐ வீழ்த்தத் துடிக்கும் ‘புரட்சிப் படை’… களத்துக்கு வந்த மாப்பிள்ளை… பரபர பாலிடிக்ஸ்… திமுகவில் நடக்கும் அதிகாரப் போர்…!

2026 தமிழக சட்டமன்றத் தேர்தலை முன்னிட்டு, மதுரை மத்திய தொகுதியில் திமுக சார்பில் மீண்டும் போட்டியிட அமைச்சர் பிடிஆர் பழனிவேல் தியாகராஜன் விருப்ப மனு அளித்துள்ள நிலையில், அவருக்கு எதிராக கட்சியின் முக்கிய நிர்வாகிகள் பலரும் களமிறங்கியிருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது. பிடிஆர் ஏற்கனவே இத்தொகுதியில் 2016 மற்றும் 2021 ஆகிய ஆண்டுகளில் வெற்றி பெற்றுள்ள நிலையில், தற்போது ‘ஹாட்ரிக்’ வெற்றியை இலக்காகக் கொண்டுள்ளார். இருப்பினும், அவருக்குப் போட்டியாக முன்னாள் மேயர் குழந்தைவேலு மற்றும் மாநகராட்சி கவுன்சிலர்கள் உள்ளிட்ட 40-க்கும் மேற்பட்டோர் விருப்ப மனு தாக்கல் செய்திருப்பது கட்சிக்குள் நிலவும் உட்கட்சிப் பூசலை வெளிச்சமிட்டுக் காட்டியுள்ளது.

அமைச்சர் பிடிஆருக்கு எதிராக இத்தனை பேர் திரண்டிருப்பதற்கு, அவருக்கும் கட்சித் தலைமைக்கும் இடையே நிலவுவதாகக் கூறப்படும் சில கருத்து வேறுபாடுகளும், உள்ளூர் நிர்வாகிகளுடன் அவர் கொண்டுள்ள அணுகுமுறையுமே காரணம் எனப் பேசப்படுகிறது. குறிப்பாக, கடந்த காலங்களில் வெளியான ஆடியோ விவகாரம் மற்றும் தொகுதிப் பணிகளில் மட்டுமே அவர் கவனம் செலுத்தி வருவது போன்ற காரணங்களால், அவருக்குப் பதிலாக உள்ளூர் முகங்களுக்கு வாய்ப்பளிக்க வேண்டும் என்ற கோரிக்கை வலுத்துள்ளது. பிடிஆரின் ஆதரவாளர்கள் அவருக்கு ஆதரவாகத் தனி மனுக்களை அளித்தாலும், அவருக்கு எதிரான “புரட்சிப் படை” போல மற்ற நிர்வாகிகள் ஓரணியில் திரண்டிருப்பது அவருக்குப் பெரும் நெருக்கடியைக் கொடுத்துள்ளது.

மதுரை மத்திய தொகுதி திமுகவின் கோட்டையாகக் கருதப்பட்டாலும், இந்த முறை அதிமுக, பாஜக மற்றும் நடிகர் விஜய்யின் தமிழக வெற்றிக் கழகம் ஆகிய கட்சிகள் இத்தொகுதியைக் குறிவைத்துத் தீவிரமாகப் பணியாற்றி வருகின்றன. இத்தகைய சவாலான சூழலில், திமுகவுக்குள் ஏற்பட்டுள்ள இந்த டிக்கெட் மோதல் கட்சியின் வெற்றியைப் பாதிக்குமோ என்ற அச்சம் எழுந்துள்ளது. எதிர்க்கட்சிகளின் பலம் கூடிவரும் வேளையில், உட்கட்சிப் பூசலைச் சரிசெய்ய வேண்டிய கட்டாயத்தில் திமுக தலைமை உள்ளது.

இந்தச் சிக்கலைத் தீர்க்க திமுக தலைமை தீவிர முயற்சிகளை மேற்கொண்டு வருகிறது. சமீபத்தில் மதுரைக்கு வருகை தந்த சபரீசன் மற்றும் முக்கிய நிர்வாகிகள், அதிருப்தியில் உள்ள நிர்வாகிகளைச் சந்தித்துப் பேசியதாகத் தெரிகிறது. ஒருவேளை கட்சித் தலைமை மீண்டும் பிடிஆர் பழனிவேல் தியாகராஜனுக்கே வாய்ப்பு வழங்கினால், அனைவரும் கருத்து வேறுபாடுகளை மறந்து ஒன்றிணைந்து உழைக்க வேண்டும் என்று அறிவுறுத்தப்பட்டுள்ளது. எனினும், வேட்பாளர் பட்டியல் வெளியாகும் வரை மதுரை மத்திய தொகுதியில் நிலவும் இந்தப் பரபரப்பு அடங்காது என்றே தோன்றுகிறது.