தவெகவில் இணைந்தும் தப்பிக்க முடியல…. இறுதியில் ஆப்பு வைத்த கோர்ட்…. உச்சகட்ட அதிர்ச்சியில் இசக்கி சுப்பையா….!

தென்காசி மாவட்டம் அம்பாசமுத்திரம் தொகுதியில் அதிமுக சார்பில் போட்டியிட்டு வெற்றி பெற்ற இசக்கி சுப்பையாவின் தேர்தல் வெற்றிக்கு எதிராகத் தொடரப்பட்ட வழக்கு தொடர்ந்து நடைபெறும் என்று சென்னை உயர் நீதிமன்றம் உத்தரவிட்டுள்ளது. சட்டமன்றத்தில் நடைபெற்ற நம்பிக்கை வாக்கெடுப்பில் கட்சி மாறி வாக்களித்ததால் தகுதி நீக்க நடவடிக்கையை எதிர்கொண்ட இசக்கி சுப்பையா, பின்னர் தனது எம்.எல்.ஏ பதவியை ராஜினாமா செய்துவிட்டு தமிழக வெற்றிக் கழகத்தில் இணைந்தார். பதவியை ராஜினாமா செய்துவிட்ட போதிலும், அவருக்கு எதிரான தேர்தல் வழக்கு முடிவுக்கு வரவில்லை.

அம்பாசமுத்திரம் தொகுதியைச் சேர்ந்த காந்தி நாதன் என்பவர், இசக்கி சுப்பையாவின் வெற்றியை செல்லாது என அறிவிக்கக் கோரி சென்னை உயர் நீதிமன்றத்தில் தேர்தல் வழக்கு தொடர்ந்திருந்தார். இந்த வழக்கை முழுமையாக நிராகரிக்கக் கோரி இசக்கி சுப்பையா தரப்பில் இடைக்கால மனு தாக்கல் செய்யப்பட்டது. இந்த மனுவை தீவிரமாக விசாரித்த நீதிபதி பி.பி. பாலாஜி, இசக்கி சுப்பையாவின் கோரிக்கையை முற்றிலுமாக நிராகரித்து, அவரது மனுவைத் தள்ளுபடி செய்து தீர்ப்பளித்தார்.

அதேபோல், தேர்தல் வழக்கு மனுவில் தனக்கு எதிராக சுமத்தப்பட்டுள்ள சில முக்கியக் குற்றச்சாட்டுகள் அடங்கிய பத்திகளை நீக்க வேண்டும் என்று இசக்கி சுப்பையா தரப்பில் வைக்கப்பட்ட கோரிக்கையையும் நீதிமன்றம் ஏற்க மறுத்துவிட்டது. இதன் மூலம், வழக்கின் அனைத்துக் குற்றச்சாட்டுகளும் நீதிமன்ற விசாரணையின் கீழ் தொடரும் என்பது உறுதி செய்யப்பட்டுள்ளது. இது இசக்கி சுப்பையா தரப்பிற்குப் பெரும் பின்னடைவாகக் கருதப்படுகிறது.

தற்போது அம்பாசமுத்திரம் தொகுதிக்கு இடைத்தேர்தல் நடத்தக் கூடாது என்ற வழக்கு நிலுவையில் இருந்து வரும் சூழலில், இந்தத் தேர்தல் வழக்கை நிராகரிக்கக் கோரிய மனு தள்ளுபடி செய்யப்பட்டிருப்பது அரசியல் களத்தில் பெரும் பரபரப்பை ஏற்படுத்தியுள்ளது. பதவி விலகினாலும் சட்டரீதியான சிக்கல்களில் இருந்து தப்பிக்க முடியாது என்பதை உணர்த்தும் வகையில் உயர் நீதிமன்றத்தின் இந்த உத்தரவு அமைந்துள்ளது.