பதறவைக்கும் காட்சி..! 40 அடி உயரத்தில் தொங்கவிடப்பட்டு வெடித்துச் சிதறிய கார்.. மொஹரம் ஊர்வலத்தில் நடந்த பகீர் சாகசம்.. 4 பேர் மீது பாய்ந்தது வழக்கு..!!

மத்தியப் பிரதேச மாநிலம் உஜ்ஜைன் மாவட்டம் பட்நகர் பகுதியில் நடைபெற்ற மொஹரம் ஊர்வலத்தின் போது, கிரேன் மூலம் ஒரு காரை சுமார் 40 அடி உயரத்தில் தொங்கவிட்டு வெடிக்கச் செய்த ஆபத்தான சாகச வீடியோ சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது. அந்த வீடியோவில், ஆயிரக்கணக்கான மக்கள் கூடியிருந்த கூட்டத்திற்கு நடுவே காரை உயரே தூக்கியபோது, அதன் மேல் இரண்டு இளைஞர்கள் சிவப்பு கொடிகளை அசைத்துக் கொண்டு நின்றனர். அதன் பிறகு காரின் ஜன்னல்கள் அனைத்தும் மூடப்பட்டு, அதற்குள் வைக்கப்பட்டிருந்த பட்டாசுகள் மற்றும் ராக்கெட்டுகள் ஒரே நேரத்தில் பற்றவைக்கப்பட்டதால், பலத்த சத்தத்துடன் கார் வெடித்துச் சிதறியது. இந்த அதிர்ச்சிகரமான சாகசம் பெரும் விபத்தை ஏற்படுத்தும் வகையில் அமைந்ததால், பொதுமக்கள் மத்தியில் கடுமையான கொந்தளிப்பை ஏற்படுத்தியது.

இந்த விவகாரம் தொடர்பாகப் பொதுமக்களின் பாதுகாப்பிற்கு அச்சுறுத்தல் ஏற்படுத்தியதாக உஜ்ஜையினி காவல்துறை உடனடியாக வழக்குப் பதிவு செய்து தீவிர விசாரணை மேற்கொண்டுள்ளது. முதற்கட்ட விசாரணையில், கார் என்ஜின் அணைக்கப்பட்டு ஜன்னல்கள் மூடப்பட்டிருந்ததால் பட்டாசு புகையினால் ஏற்பட்ட அழுத்தமே இந்த வெடிப்பு போன்ற காட்சிக்குக் காரணம் என்றும், இந்தச் சாகசத்திற்கு அரசிடம் எந்தவித அனுமதியும் பெறப்படவில்லை என்றும் தெரியவந்துள்ளது. இதனைத் தொடர்ந்து, நிகழ்ச்சி ஏற்பாட்டாளர் சோயிப் கான், கொடி அசைத்த ஜாஹித் கான், தஸ்லிம் மற்றும் கிரேனின் உரிமையாளர் கோபால் மாலி ஆகிய 4 பேர் மீது பாரதிய நியாய சன்ஹிதா சட்டப்பிரிவுகளின் கீழ் வழக்குப் பதிவு செய்யப்பட்டு, முக்கியக் குற்றவாளிகள் கைது செய்யப்பட்டுள்ளனர்.