தமிழக அரசியல் களத்தில் தற்போதைய முதலமைச்சர் விஜய் மற்றும் முன்னாள் முதலமைச்சர் மு.க.ஸ்டாலின் இடையேயான அரசியல் மோதல் புதிய உச்சத்தை எட்டியுள்ளது. நடந்து முடிந்த சட்டமன்ற தேர்தலில் கொளத்தூர் தொகுதியில் மு.க.ஸ்டாலின் தோல்வியடைந்ததை, முதலமைச்சர் விஜய் சட்டமன்றத்தில் ஒரு ‘குட்டிக் கதை’ மூலம் கிண்டலடித்திருந்தார். அத்துடன் உதயநிதியைப் பார்த்து “உங்க அப்பா எங்கே, காணோம்?” என்று அவர் வினவியது திமுகவினரிடையே கடும் கொந்தளிப்பை ஏற்படுத்தியிருந்தது. இந்தச் சூழலில், திருச்சியில் நடைபெற்ற நிகழ்ச்சி ஒன்றில் பேசிய திமுக முன்னாள் அமைச்சர் கே.என்.நேரு, மு.க.ஸ்டாலின் மீண்டும் சட்டமன்றத்திற்குள் வருவது உறுதி என அதிரடியாக தெரிவித்து விஜய்யின் விமர்சனத்திற்கு பதிலடி கொடுத்துள்ளார்.
கே.என்.நேருவின் இந்த அதிரடி பேச்சு, தமிழகத்தில் விரைவில் நடைபெறவிருக்கும் இடைத்தேர்தலில் மு.க.ஸ்டாலின் மீண்டும் போட்டியிடப் போகிறாரா என்ற பெரிய கேள்வியையும், விவாதத்தையும் அரசியல் வட்டாரத்தில் கிளப்பியுள்ளது. முன்னதாக, முதலமைச்சர் விஜய் தனது திருச்சி கிழக்கு தொகுதி சட்டமன்ற உறுப்பினர் பதவியை ராஜினாமா செய்தபோது, அந்தப் பகுதியில் மு.க.ஸ்டாலின் போட்டியிடுவார் என பலத்த வதந்திகள் பரவின. ஆனால், அதன் பின்னர் ஸ்டாலின் அவர்கள் நேரடித் தேர்தல் அரசியலில் இருந்து ஓய்வு பெற்று, திமுக தலைவராக இருந்து கொண்டு கட்சிக்கு ஆலோசனைகளை மட்டுமே வழங்குவார் என்று கூறப்பட்ட நிலையில், தற்போது நேருவின் பேச்சு மீண்டும் ஒரு பரபரப்பை உண்டாக்கியுள்ளது.
முன்னாள் அமைச்சரின் இந்த கருத்து ஒருபுறம் தொண்டர்களிடையே உற்சாகத்தை ஏற்படுத்தியிருந்தாலும், பொதுமக்கள் மத்தியில் குழப்பத்தையும் எதிர்பார்ப்பையும் ஒருசேர உருவாக்கியுள்ளது. கடந்த தேர்தலில் ஆட்சியை இழந்ததோடு, தங்களின் தலைவரும் தோல்வியுற்ற அதிர்ச்சியில் இருந்து மீளாத திமுகவினருக்கு, இந்த அறிவிப்பு புதிய நம்பிக்கையை தந்துள்ளது. அதேநேரம், தீவிர அரசியலில் இருந்து ஒதுங்கியிருக்கப் போவதாகக் கூறப்பட்ட மு.க.ஸ்டாலின், விஜய்யின் சவாலை ஏற்று மீண்டும் இடைத்தேர்தல் களம் காண்பாரா என்பதைப் பொறுத்திருந்துதான் பார்க்க வேண்டும்.