மும்பையின் கடலோரச் சாலை சுரங்கப்பாதையில், நள்ளிரவில் பல சொகுசு கார்கள் அதிவேகமாகச் சென்று ஒன்றையொன்று முந்திச் சென்று பந்தயத்தில் ஈடுபட்ட சம்பவம் பரபரப்பை ஏற்படுத்தியுள்ளது. இரவு 11 மணியளவில் நடந்த இச்சம்பவத்தை சனா கான் என்ற விழிப்புணர்வுள்ள குடிமகன் ஒருவர் வீடியோவாகப் படம்பிடித்துள்ளார். இதில் மஞ்சள் மற்றும் சிவப்பு நிற சூப்பர்கார்கள் உட்பட 6 முதல் 7 சொகுசு வாகனங்கள் சுரங்கப்பாதைக்குள் ஆபத்தான முறையில் சென்றது தெரியவந்துள்ளது.
இந்த வீடியோ சமூக வலைதளங்களில் வைரலானதைத் தொடர்ந்து, மரைன் டிரைவ் காவல் துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர். அவசர கால வாகனங்கள் மற்றும் பேருந்துகளுக்காக ஒதுக்கப்பட்ட பிரத்யேக தடத்தில் இந்த வாகனங்கள் இயக்கப்பட்டதாகக் காவல்துறையினர் தெரிவித்துள்ளனர். மேலும், நிர்ணயிக்கப்பட்ட வேக வரம்பை மீறியதாகவும், வழித்தட விதிகளைப் பின்பற்றாமல் இயக்கியதாகவும் கார்களின் ஓட்டுநர்கள் மீது குற்றம் சாட்டப்பட்டுள்ளது.
https://twitter.com/HateDetectors/status/2097664560115372310/video/1
தற்போது, இச்சம்பவத்தில் ஈடுபட்ட வாகனங்கள் மற்றும் அவற்றை இயக்கிய ஓட்டுநர்களைக் கண்டறிவதற்காகக் காவல்துறையினர் சனா கான் எடுத்த வீடியோ காட்சிகள் மற்றும் சுரங்கப்பாதையில் உள்ள பிற கண்காணிப்புச் கேமரா ஆதாரங்களை தீவிரமாக ஆய்வு செய்து வருகின்றனர். விதிகளை மீறி பொதுமக்களுக்கு ஆபத்தை விளைவிக்கும் வகையில் செயல்பட்டவர்கள் மீது சட்டப்படி கடும் நடவடிக்கை எடுக்கப்படும் என்றும் எதிர்பார்க்கப்படுகிறது.