கடந்த இரண்டு நாள்களாகச் சமையல் சிலிண்டர் தட்டுப்பாடு குறித்த செய்திகள் மக்கள் மத்தியில் பெரும் அச்சத்தை ஏற்படுத்தி வரும் நிலையில், நிலைமையைச் சீர்செய்யும் நோக்கில் தமிழ்நாடு முதல்வர் மு.க. ஸ்டாலின் அவர்கள் உயர் அதிகாரிகளுடன் அவசர ஆலோசனை மேற்கொண்டுள்ளார்.
மாநிலத்திலுள்ள சிலிண்டர் கையிருப்பு மற்றும் அதன் தேவை குறித்து விரிவாகக் கேட்டறிந்த முதல்வர், தட்டுப்பாட்டை உடனடியாகப் போக்கவும், அனைத்துக் குடும்பங்களுக்கும் தடையின்றி வீட்டு உபயோக சிலிண்டர்கள் கிடைப்பதை உறுதி செய்யவும் அதிகாரிகளுக்குக் கடுமையான உத்தரவுகளைப் பிறப்பித்துள்ளார். மக்களின் அத்தியாவசியத் தேவையைப் புரிந்துகொண்டு, விநியோகச் சங்கிலியில் உள்ள தடைகளை நீக்கி, தட்டுப்பாடு குறித்த தேவையற்ற பீதியைத் தவிர்க்க அரசு முனைப்புடன் செயல்பட்டு வருவதால், விரைவில் நிலைமை இயல்புக்குத் திரும்பும் என எதிர்பார்க்கப்படுகிறது.