தமிழ்நாட்டில் கனிம வளங்களைக் கொண்டுசெல்லும் லாரிகள் மற்றும் சரக்கு வாகனங்கள் சட்டவிரோதக் கடத்தலில் ஈடுபடுவதைத் தடுக்கவும், அவற்றின் இயக்கத்தை வெளிப்படையாகக் கண்காணிக்கவும் தமிழக அரசு புதிய விதிமுறையைக் கொண்டுவந்துள்ளது. இதன்படி, அனைத்து கனிம வாகனங்களிலும் AIS-140 தரநிலைக் கொண்ட ஜி.பி.எஸ். கருவி பொருத்தப்பட்டு, அது புவியியல் மற்றும் சுரங்கத் துறையின் அதிகாரப்பூர்வ இணையதளத்துடன் இணைக்கப்பட வேண்டும் என்று உத்தரவிடப்பட்டிருந்தது. இதற்கான கால அவகாசம் அக்டோபர் 31-ஆம் தேதியுடன் முடிவடைந்த நிலையில், நவம்பர் 1 முதல் இந்த நடைமுறை முழுமையாக அமலுக்கு வந்துள்ளது.
இப்புதிய உத்தரவின்படி, உரிய ஜி.பி.எஸ். கருவி பொருத்தப்படாத மற்றும் இணையதள ஒருங்கிணைப்பு செய்யப்படாத எந்தவொரு வாகனத்திற்கும் கனிமப் போக்குவரத்து அனுமதிச் சீட்டு வழங்கப்பட மாட்டாது என்று அரசு திட்டவட்டமாகத் தெரிவித்துள்ளது. செல்லத்தக்க அனுமதிச் சீட்டு அல்லது ஜி.பி.எஸ். கண்காணிப்புக் கருவி இல்லாமல் தடையை மீறி கனிமங்களை ஏற்றிச்செல்லும் வாகனங்கள் உடனடியாகப் பறிமுதல் செய்யப்படும் எனவும், அதன் உரிமையாளர்கள் மீது கடுமையான குற்றவியல் சட்ட நடவடிக்கைகள் பாயும் எனவும் சுரங்கத்துறை எச்சரித்துள்ளது.
பொதுமக்கள் மற்றும் கட்டுமானத் துறையினருக்குத் தேவையான மணல், ஜல்லி போன்ற அத்தியாவசியப் பொருட்கள் தடையின்றி கிடைப்பதை உறுதிசெய்யும் நோக்கில், லாரி உரிமையாளர்கள் காலதாமதமின்றி அங்கீகரிக்கப்பட்ட ஜி.பி.எஸ். கருவிகளைப் பொருத்தி துறையின் இணையதளத்தில் இணைக்க வேண்டும் என்று கேட்டுக்கொள்ளப்பட்டுள்ளது. விநியோகச் சங்கிலி பாதிக்கப்படாமல் இருக்கவும், தேவையற்ற போக்குவரத்துச் சிக்கல்களைத் தவிர்க்கவும் வாகன உரிமையாளர்கள் மாவட்ட நிர்வாகத்துடனும் சுரங்கத்துறையுடனும் முழுமையாக ஒத்துழைக்குமாறு அரசு அறிவுறுத்தியுள்ளது.