தமிழகச் சட்டப்பேரவையில் தாக்கல் செய்யப்பட்ட 2026-27 நிதி ஆண்டிற்கான வரவு செலவுத் திட்டத்தில் அரசின் வருமானம், செலவினங்கள் மற்றும் கடன் நிலவரங்கள் தெளிவாக அறிவிக்கப்பட்டுள்ளன. அதன்படி, மாநிலத்தின் சொந்த வரி வருவாயாக ரூ.2,26,740 கோடியும், வரி அல்லாத வருவாயாக ரூ.27,835 கோடியும் ஈட்ட இலக்கு நிர்ணயிக்கப்பட்டுள்ளது. மேலும், மத்திய வரிகளின் பங்காக ரூ.62,531 கோடியும், உதவி மானியங்களாக ரூ.32,922 கோடியும் கிடைக்கப்பெறும் என மதிப்பிடப்பட்டுள்ளது. அதேவேளையில், அரசின் மொத்தச் செலவினம் ரூ.4,05,802 கோடியாக இருக்கும் எனக் கணக்கிடப்பட்டுள்ளது.
செலவினங்களைப் பொறுத்தவரை, அரசுப் பணியாளர்களின் ஊதியத்திற்காக ரூ.91,032 கோடியும், ஓய்வூதியப் பலன்களுக்காக ரூ.41,846 கோடியும், பழைய கடன்களுக்கான வட்டி செலுத்த ரூ.78,683 கோடியும் ஒதுக்கப்பட்டுள்ளது. இப்போதைய நிதிநிலையில் வருவாய்ப் பற்றாக்குறை ரூ.55,775 கோடியாக உள்ள சூழலில், 2027-ஆம் ஆண்டு மார்ச் மாத நிலவரப்படி மாநிலத்தின் மொத்த நிலுவைக் கடன் ரூ.10,98,768 கோடியாக அதிகரிக்கும் என நிதிநிலை அறிக்கையில் தெரிவிக்கப்பட்டுள்ளது.