பெண்களின் பாதுகாப்பிற்கு சிங்கப்பெண் படை ..! மேலும் 18 போலீசார் நியமனம்.. தமிழ்நாடு காவல் துறை அதிரடி உத்தரவு..!!

தமிழ்நாட்டில் பெண்கள் மற்றும் குழந்தைகளின் பாதுகாப்பை உறுதி செய்வதற்காக உருவாக்கப்பட்டுள்ள ‘சிங்கப்பெண் சிறப்புப் படை’ பிரிவுக்கு, கூடுதல் பலமாக 2 உதவி ஆய்வாளர்கள் (SI) உட்பட மேலும் 18 காவல் துறையினர் பணியிட மாற்றம் மூலம் நியமிக்கப்பட்டுள்ளனர். இந்த புதிய நியமனங்களுக்கான உத்தரவை தமிழக காவல்துறை தலைமை இயக்குநர் (DGP) அலுவலகம் பிறப்பித்துள்ளது. இச்சிறப்புப் படையின் காவல் துறை கண்காணிப்பாளர் (IGP) விடுத்த கோரிக்கையை ஏற்று, இந்த அதிரடி நடவடிக்கை மேற்கொள்ளப்பட்டுள்ளது.

இந்த நியமனங்களில் குறிப்பாக, சைபர் கிரைம் பிரிவைச் சேர்ந்த 2 உதவி ஆய்வாளர்கள் சேர்க்கப்பட்டுள்ளனர். டிஜிட்டல் நுண்ணறிவு மற்றும் இணையவழி குற்றப் புலனாய்வில் நிபுணத்துவம் பெற்ற இவர்களின் வருகை, பெண்களுக்கு எதிரான ஆன்லைன் குற்றங்களை விரைவாகக் கண்டறிய உதவும் என்று எதிர்பார்க்கப்படுகிறது. இவர்களுடன் சமூக ஊடகப் பிரிவில் பணியாற்றிய தலைமைக் காவலர் மற்றும் முதல் நிலைக் காவலர் ஒருவரும், ஆவடி, கோவைப்புதூர், உளுந்தூர்ப்பேட்டை போன்ற பகுதிகளில் உள்ள தமிழ்நாடு சிறப்புக் காவல் படைகளைச் சேர்ந்த காவலர்களும் இப்படைக்கு மாற்றப்பட்டுள்ளனர்.

புதிதாகத் தொடங்கப்பட்டுள்ள ‘சிங்கப்பெண் சிறப்புப் படை’யின் செயல்பாட்டுத் திறனை வலுப்படுத்துவதே இந்த நியமனங்களின் முக்கிய நோக்கமாகும். பணியிட மாற்றம் செய்யப்பட்டுள்ள 18 போலீசாரும் உடனடியாகப் பொறுப்புகளில் இருந்து விடுவிக்கப்பட்டு, சிங்கப்பெண் சிறப்புப் படையின் ஐஜிபி (IGP) முன்னிலையில் உடனடியாகப் பணியில் இணையுமாறு அந்தந்தத் துறை அதிகாரிகளுக்கு அறிவுறுத்தப்பட்டுள்ளது.