“ஒரு சொட்டு நீர் கூட தர முடியாது”…. டெல்லியில் அதிரடி காட்டிய டி.கே.சிவக்குமார்…. தமிழகத்திற்குப் பேரதிர்ச்சி….!

தற்போதைய சூழலில் காவிரிப் படுகையில் இருந்து தமிழ்நாட்டிற்குத் தண்ணீர் திறந்துவிட முடியாது என்று கர்நாடக துணை முதல்வரும் நீர்வளத்துறை அமைச்சருமான டி.கே. சிவக்குமார் திட்டவட்டமாகத் தெரிவித்துள்ளார். புதுடெல்லியில் செய்தியாளர்களைச் சந்தித்த அவர், தமிழகத்திற்குக் காவிரி நீரைத் திறந்துவிட வேண்டும் என்ற மத்திய நீர்வள ஆணையத்தின் உத்தரவுக்கு எதிராக மேல்முறையீடு செய்வதற்கான பணிகளில் கர்நாடக மாநிலச் சட்டக் குழு தீவிரமாக ஈடுபட்டு வருவதாகக் கூறினார்.

பாசன நீர் விவகாரத்தில் மத்திய நீர்வள ஆணையம் அண்மையில் உத்தரவொன்றைப் பிறப்பித்துள்ளதைச் சுட்டிக்காட்டிய அவர், இதற்கு முன்பும் கர்நாடகாவின் கோரிக்கைகள் இருமுறை நிராகரிக்கப்பட்டதாகக் குறிப்பிட்டார். இதன் காரணமாக, அமைச்சர் எம்.பி. பாட்டீல் மற்றும் உயர் அதிகாரிகளுடன் மேல்முறையீடு செய்வது குறித்து விரிவாகப் பேசியிருப்பதாகவும், சட்டப்பூர்வ நடவடிக்கை எடுத்த பிறகு இறுதி முடிவு அறிவிக்கப்படும் என்றும் தெரிவித்தார். மேலும், பெங்களூரு திரும்பியவுடன் அனைத்து எதிர்க்கட்சித் தலைவர்களுடனும் இது குறித்து ஆலோசிக்கவுள்ளதாகவும் அவர் தெரிவித்தார்.

அதேவேளையில், காவிரிப் பிரச்சினை தொடர்பாக நேரில் சந்தித்துப் பேசத் தமிழக அரசு விருப்பம் தெரிவித்துள்ளதாகக் கூறிய டி.கே. சிவக்குமார், அம்மாநிலத் தலைமைச் செயலாளர் கடிதம் எழுதியுள்ளதையும் சுட்டிக்காட்டினார். அண்டை மாநிலத்திற்கு உரிய மரியாதையை அளிப்பதும் பேச்சுவார்த்தைக்கு மதிப்பளிப்பதும் கடமை என்ற அடிப்படையில் அவர்களை வருமாறு கூறியுள்ளதாகவும், அதேசமயம் கர்நாடக காவிரிப் படுகைப் பகுதிகளின் நீர் இருப்பை நேரில் ஆய்வு செய்யத் தேவையான ஹெலிகாப்டர் வசதிகளை ஏற்பாடு செய்யுமாறு கேட்டுக்கொண்டுள்ளதாகவும் தெரிவித்தார்.