திமுகவின் கட்டமைப்பு மறுசீரமைப்பின் ஒரு பகுதியாக, உட்கட்சி தேர்தலை ஜனநாயக அடிப்படையில் நேரடியாக நடத்த வேண்டும் என்ற கோரிக்கையை திமுக துணைப் பொதுச்செயலாளர் கனிமொழி முன்வைத்துள்ள நிலையில், அது கட்சிக்குள் புதிய விவாதங்களை கிளப்பியுள்ளது. மாவட்டச் செயலாளர்களின் எண்ணிக்கையை 110 ஆக உயர்த்தியுள்ள நிலையில், நேரடியாகத் தேர்தல் நடத்தினால் பல்வேறு மாவட்டங்களில் ஆதரவாளர்களிடையே மோதல் வெடித்துக் கட்சி அமைப்பில் பிளவு ஏற்படக்கூடும் என்ற அச்சமும் நிலவுகிறது.
இதைக் கருத்தில் கொண்டு, மோதல்களைத் தவிர்க்கவும் சமநிலையைப் பேணவும் மாவட்டப் பிரதிநிதிகள் மூலமாக நிர்வாகிகளைத் தேர்ந்தெடுக்கும் நுட்பமான நகர்வை கட்சித் தலைவர் மு.க.ஸ்டாலின் முன்னெடுத்து வருகிறார். வரவிருக்கும் உள்ளாட்சித் தேர்தலுக்கு முன் அடிமட்டத் தொண்டர்களின் அதிருப்தியைச் சரிசெய்து கட்சியைப் பலப்படுத்த வேண்டிய கட்டாயத்தில் திமுக இருப்பதால், சீனியர்கள், இளைஞரணி மற்றும் கனிமொழியின் ஆதரவாளர்கள் என அனைத்துத் தரப்பையும் திருப்திப்படுத்தும் வகையில் சுமுகமான முறையில் பொறுப்பாளர்களை நியமிக்க ஸ்டாலின் திட்டமிட்டு வருகிறார்.