“அதிமுக – விஜய் கூட்டணி உண்மையா?”…. கடம்பூர் ராஜுவின் ஒற்றை வார்த்தையில் அதிரும் அரசியல் களம்….!

தமிழக அரசியலில் வரவிருக்கும் சட்டமன்றத் தேர்தலை ஒட்டி கூட்டணிக் கணக்குகள் சூடுபிடிக்கத் தொடங்கியுள்ளன. இந்நிலையில், அதிமுக முன்னாள் அமைச்சர் கடம்பூர் ராஜூ செய்தியாளர்களிடம் பேசுகையில், தமிழக வெற்றி கழகத் தலைவர் விஜய் தேசிய ஜனநாயகக் கூட்டணியில் (NDA) இணைவதற்கான சாத்தியக்கூறுகள் குறித்து சூசகமான கருத்துக்களைத் தெரிவித்துள்ளார். திமுகவை வீழ்த்த வேண்டும் என்பதே அதிமுகவின் பிரதான இலக்கு என்றும், அதற்காக ஒத்த கருத்துடையவர்கள் ஒன்றிணைவது சரியாக இருக்கும் என்றும் அவர் குறிப்பிட்டுள்ளார்.

திமுகவை தனது அரசியல் எதிரி என்று விஜய் ஏற்கனவே அறிவித்துள்ளதைச் சுட்டிக்காட்டிய கடம்பூர் ராஜூ, விஜய் கட்சி தொடங்கியது முதல் திமுகவுக்கு எதிரான நிலைப்பாட்டையே உறுதியாக எடுத்து வருவதாகக் கூறினார். அதிமுகவின் கொள்கையும் திமுகவை வீழ்த்துவதுதான் என்பதால், இந்த இலக்கை அடைய அனைவரும் ஒன்றாக இருக்க வேண்டும் என்பது தங்களின் விருப்பம் என்று அவர் தெரிவித்தார். இருப்பினும், கூட்டணியில் இணைவது குறித்த இறுதி முடிவை அந்தந்தக் கட்சிகளே எடுக்க வேண்டும் என்பதையும் அவர் தெளிவுபடுத்தினார்.

தேசிய ஜனநாயகக் கூட்டணியைப் பொறுத்தவரை அதிமுகவே தலைமை தாங்கும் என்றும், எடப்பாடி பழனிசாமி தான் முதலமைச்சர் வேட்பாளர் என்பதில் மத்திய அமைச்சர் பியூஸ் கோயல் உள்ளிட்ட பாஜக தலைவர்கள் தெளிவாக இருப்பதாகவும் அவர் கூறினார். மற்ற கட்சிகளுடன் ஒப்பிடுகையில் அதிமுக – பாஜக கூட்டணி மிகவும் பலமாக இருப்பதாகவும், தொகுதிப் பங்கீடு உள்ளிட்ட விஷயங்களில் எவ்விதக் குழப்பமும் இன்றி சுமூகமான சூழல் நிலவுவதாகவும் கடம்பூர் ராஜூ நம்பிக்கை தெரிவித்தார்.

மறுபுறம், திமுக கூட்டணியில் தொகுதிப் பங்கீட்டில் இழுபறி நீடிப்பதாக விமர்சித்த அவர், மார்ச் 17-ல் சிபிஐ விசாரணைக்கு விஜய் ஆஜராவதை அரசியலோடு தொடர்புபடுத்தத் தேவையில்லை என்றும் அது ஒரு சாதாரண நடைமுறை என்றும் கூறினார். விஜய்யின் அரசியல் வருகை தமிழக தேர்தல் களத்தில் பெரும் எதிர்பார்ப்பை ஏற்படுத்தியுள்ள நிலையில், கடம்பூர் ராஜூவின் இந்த கருத்துக்கள் அரசியல் வட்டாரத்தில் புதிய விவாதங்களை கிளப்பியுள்ளன.