தமிழக முதல்வர் மு.க. ஸ்டாலின் அவர்கள் மகளிர் உரிமைத் தொகை மற்றும் கோடைக்கால சிறப்பு நிதி என மொத்தம் ₹5,000 தொகையைப் பயனாளிகளின் வங்கிக் கணக்கில் நேரடியாகச் செலுத்தி ‘இன்ப அதிர்ச்சி’ கொடுத்துள்ளார். இதனைத் தொடர்ந்து, திமுகவின் முக்கியத் தேர்தல் வாக்குறுதியான ‘நகைக் கடன் தள்ளுபடி’ குறித்த எதிர்பார்ப்பு பொதுமக்கள் மத்தியில் மீண்டும் வலுப்பெற்றுள்ளது. குறிப்பாக, ஏழை மற்றும் நடுத்தர மக்கள் தங்களது வாழ்வாதாரத்திற்காகக் கூட்டுறவு வங்கிகளில் வைத்துள்ள நகைக் கடன்கள் எப்போது தள்ளுபடி செய்யப்படும் என்ற ஆவலுடன் காத்திருக்கின்றனர்.
மக்களின் இந்த எதிர்பார்ப்பைப் பூர்த்தி செய்யும் வகையில், தமிழக அரசு தற்போது ஒரு முக்கிய நடவடிக்கையை எடுத்துள்ளதாகத் தகவல்கள் கசிந்துள்ளன. மாநிலம் முழுவதிலும் உள்ள கூட்டுறவு வங்கிகளில் நிலுவையில் உள்ள நகைக் கடன்கள் மற்றும் தகுதியான பயனாளிகளின் விவரங்களைச் சமர்ப்பிக்குமாறு அதிகாரிகளுக்கு அரசு உத்தரவிட்டுள்ளதாகக் கூறப்படுகிறது. இதற்கான தரவுகள் சேகரிக்கப்பட்டு வருவதால், வரும் பிப்ரவரி 26-ம் தேதி தேர்தல் தேதி அறிவிக்கப்படுவதற்கு முன்னதாகவே, நகைக் கடன் தள்ளுபடி குறித்த அதிகாரப்பூர்வமான மற்றும் மகிழ்ச்சியான அறிவிப்பு வெளியாகலாம் என அரசியல் வட்டாரங்களில் பலமாக எதிர்பார்க்கப்படுகிறது.