தமிழ் சினிமாவில் அலைபாயுதே படம் மூலமாக மணிரத்னத்தால் அறிமுகப்படுத்தப்பட்டவர் மாதவன். அந்த படம் ஹிட்டாக தமிழ் சினிமாவின் சாக்லேட் பாய் கதாநாயகர்களில் ஒருவரானார். தொடர்ந்து பல ஹிட் படங்களைக் கொடுத்து தற்போது முன்னணி நடிகராக வலம் வருகிறார்.
அலைபாயுதே ஹிட்டானதும் விஜய், அஜித் போன்ற அப்போதைய இளம் ஹீரோக்கள் ஏழெட்டு ஆண்டுகள் போராடி பெற்ற புகழை மாதவன் ஒரே படத்தில் பெற்றார். அதையடுத்து அவர் நடித்த என்னவளே என்ற திரைப்படம் பெரும் எதிர்பார்ப்புகளுக்கு மத்தியில் ரிலீஸ் ஆனது. ஆனால் அந்த படம் எதிர்பார்த்த வெற்றியைப் பெறவில்லை.
காதல் படங்களாக நடித்துக் கொண்டிருந்த மாதவன் ஆக்ஷன் ரூட்டுக்கு மாறுமுன்னர் நடித்த காதல் படங்களில் ஒன்றுதான் ஜே ஜே. அஜித்தின் ஆஸ்தான இயக்குனர் சரண் இயக்கத்தில் மாதவன், அமோகா, பூஜா, கலாபவன் மணி, டெல்லி கணேஷ், சார்லி, மாளவிகா அவினாஷ் என பலர் நடித்த இந்த படம் 2003 ஆம் ஆண்டு வெளியானது.
#image_title
இந்த படம் பெரியளவில் வெற்றிபெறவில்லை என்றாலும் அதன்பின்னர் ரசிகர்களால் கொண்டாடப்பட்டு வருகிறது. படத்தில் மாதவனின் நடிப்பும், பரத்வாஜ்-வைரமுத்து வெற்றிக் கூட்டணியின் அழகான பாடல்களும் இன்றளவும் இந்த படத்தை நினைவுகொள்ளத் தக்க ஒன்றாக அமைந்துள்ளன.
காதல் படமான இதில் கதாநாயகனும் கதாநாயகியும் சேர்ந்திருப்பதே பத்து நிமிடம்தான் இருக்கும். அந்த 10 நிமிடத்தில் கூட அவர்கள் காதலர்களாக இல்லாமல் முன்பின் அறியாத நபர்களாகவே இருப்பார்கள். அதன் பின்னர் கதாநாயகி கொல்கத்தா சென்றுவிட அவளைத் தேடி கதாநாயகன் அலைவதுதான் கதை. அதன் பின்னர் க்ளைமேக்ஸில்தான் இருவரும் சந்தித்துக் கொள்வார்கள்.
ஒரு காதல் படத்தில் காதலர்கள் இருவரும் திரையில் ஒன்றாமல் மொத்தப் படத்தையும் போரடிக்காமல் இழுத்து செல்லும் வித்தையை செய்து காட்டியிருப்பார் இயக்குனர் சரண். இதற்கு முன்னர் இதே போன்ற கதையமைப்பில் அகத்தியனின் காதல் கோட்டை திரைப்படம் அமைந்தது குறிப்பிடத்தக்கது.