நடிகர் விஜய்யின் இறுதித் திரைப்படமாக எதிர்பார்க்கப்படும் ‘ஜனநாயகன்’ படத்தின் வெளியீடு மீண்டும் தள்ளிப்போயுள்ளது ரசிகர்களிடையே பெரும் சோகத்தை ஏற்படுத்தியுள்ளது. கனடா நாட்டின் விநியோகஸ்தரான யோர்க் சினிமாஸ் (York Cinemas) வெளியிட்டுள்ள அதிகாரப்பூர்வ அறிவிப்பில், இப்படம் ஏப்ரல் 30-ம் தேதிக்கு முன் திரையரங்குகளுக்கு வராது என்பதை உறுதிப்படுத்தியுள்ளது. சென்சார் நடைமுறைகளில் நீடித்து வரும் சிக்கல்கள் மற்றும் சான்றிதழ் பெறுவதில் ஏற்பட்டுள்ள தாமதமே இந்தத் தள்ளிப்போகலுக்கு முக்கியக் காரணமாகக் கூறப்படுகிறது.
முன்னதாக இப்படம் பொங்கல் பண்டிகைக்கும், பின்னர் பிப்ரவரி மாதத்திலும் வெளியாகும் என எதிர்பார்க்கப்பட்ட நிலையில், தற்போது ஏப்ரல் இறுதி வரை வாய்ப்பில்லை என்பது உறுதியாகியுள்ளது. இதனால் ஏற்கனவே முன்பதிவு செய்திருந்த ரசிகர்கள் தங்களது டிக்கெட் தொகையைத் (Refund) திரும்பப் பெற்றுக் கொள்ளலாம் என்றும் விநியோகஸ்தர் தரப்பில் தெரிவிக்கப்பட்டுள்ளது. படத்தின் தயாரிப்பு நிறுவனமான கேவிஎன் (KVN) புரொடக்ஷன்ஸ் இது குறித்த அதிகாரப்பூர்வமான புதிய தேதியை விரைவில் அறிவிக்கும் என எதிர்பார்க்கப்படுகிறது.