தமிழக வெற்றிக் கழகத் தலைவரும் நடிகருமான விஜய் நடிப்பில் உருவான ‘ஜனநாயகன்’ திரைப்படம், தணிக்கை சிக்கல்கள் மற்றும் தேர்தல் நடத்தை விதிகள் காரணமாக நீண்ட நாட்களாக ரிலீஸ் தள்ளிப்போய் வந்தது. பொங்கல் ரிலீஸ் என அறிவிக்கப்பட்டு, பின் தேர்தலுக்குப் பிறகுதான் படம் வெளியாகும் என்ற சூழலில், ரசிகர்கள் மிகுந்த ஏமாற்றத்தில் இருந்தனர். இந்த இக்கட்டான நிலையில், படம் திரையரங்கிற்கு வரும் முன்பே முழுமையாக இணையதளங்களில் கசிந்தது ஒட்டுமொத்தத் திரையுலகையும், விஜய் ரசிகர்களையும் பெரும் அதிர்ச்சியில் ஆழ்த்தியது.
இந்தச் சட்டவிரோதச் செயல் குறித்துப் படக்குழு அளித்த புகாரின் பேரில், தமிழக சைபர் கிரைம் போலீசார் தீவிர விசாரணையில் இறங்கினர். முதற்கட்டமாக 6 பேரை ஏற்கனவே கைது செய்திருந்த நிலையில், தற்போது இந்த விவகாரத்தில் தொடர்புடைய மேலும் 3 முக்கியக் குற்றவாளிகளைப் போலீசார் அதிரடியாகக் கைது செய்துள்ளனர். அத்துடன் அவர்கள் கையாண்ட நூற்றுக்கும் மேற்பட்ட இணையதள லிங்க்குகளும் அதிரடியாக நீக்கப்பட்டுள்ளன. கைதானவர்களிடம் நடத்தப்பட்ட விசாரணையில், படம் எப்படி லீக் ஆனது என்பது குறித்த திடுக்கிடும் தகவல்கள் வெளியாகியுள்ளன.
இந்தத் திருட்டுச் சம்பவத்தின் பின்னணியில் ஒரு ‘ஃப்ரீலான்ஸ்’ படத்தொகுப்பாளர் (Freelance Editor) இருப்பது கண்டறியப்பட்டுள்ளது. எடிட்டிங் ஸ்டூடியோவில் பணியாற்றியபோது, அங்குள்ள ரீல்களை ரகசியமாகத் திருடி, பின்னர் அவற்றை முழுத் திரைப்படமாகத் தொகுத்து இணையத்தில் வெளியிட்டது தெரியவந்துள்ளது. நம்பிக்கைக்கு உரிய இடமாக இருக்க வேண்டிய எடிட்டிங் ரூமிலிருந்தே படத்தின் காட்சிகள் திருடப்பட்டது படக்குழுவினரை நிலைகுலைய வைத்துள்ளது.
தற்போது கைதான 3 நபர்களிடமும் போலீசார் தீவிர விசாரணை நடத்தி வருகின்றனர். ஒரு முக்கிய நடிகரின் படம் வெளியாவதற்கு முன்பே இவ்வாறு கசிந்தது திரையுலகில் பெரும் விவாதத்தை ஏற்படுத்தியுள்ள நிலையில், சட்டவிரோதமாகப் படக் காட்சிகளைப் பகிர்வோர் மீது கடும் நடவடிக்கை எடுக்கப்படும் எனப் படக்குழு எச்சரித்துள்ளது. தணிக்கை மற்றும் நீதிமன்றச் சிக்கல்களைத் தாண்டி படம் வெளியாகக் காத்திருந்த நிலையில், இத்தகைய தொழில்நுட்பத் திருட்டு ரசிகர்களிடையே கடும் கொந்தளிப்பை ஏற்படுத்தியுள்ளது.