“9 வயது மகளின் அலறல் சத்தம்… தந்தை செய்த கொடூரம்”… அதிகாலையில் தாய்க்கு வந்த அந்த ஒரு போன் கால்… மாடியில் காத்திருந்த அதிர்ச்சி…!

சென்னை திரு.வி.க நகர் பகுதியில் அரங்கேறியுள்ள இந்த அதிர்ச்சிகரமான இரட்டைக் கொலை சம்பவம் ஒட்டுமொத்தப் பகுதியையும் உலுக்கியுள்ளது. தனியார் நிறுவனத்தில் செக்யூரிட்டியாகப் பணியாற்றி வரும் சீனிவாசன் என்பவர், தனது மனைவி சிவரஞ்சனி மற்றும் 9 வயது மகள் ஜெயஹரிணி ஆகியோரைத் துடிக்கத் துடிக்கக் கொலை செய்துள்ளார். கடந்த இரண்டு ஆண்டுகளாக மனநலப் பாதிப்பிற்காகச் சிகிச்சை பெற்று வந்த சீனிவாசன், தனது மனைவியின் நடத்தையில் கொண்ட கடும் சந்தேகமே இந்த விபரீத முடிவுக்குக் காரணமாகக் கூறப்படுகிறது.

சம்பவத்தன்று இரவு பணி முடிந்து வீடு திரும்பிய சீனிவாசன், மாடியில் தனது மனைவி மற்றும் மகளுடன் உறங்கச் சென்றுள்ளார். நள்ளிரவில் கணவன் – மனைவி இடையே திடீரென வாக்குவாதம் வெடித்ததில், ஆத்திரத்தின் உச்சத்துக்கே சென்ற சீனிவாசன் கத்தியால் சிவரஞ்சனியின் கழுத்தை அறுத்துள்ளார். இதைக் கண்டு அலறிய தனது 9 வயது மகள் ஜெயஹரிணியையும், சத்தம் வெளியே கேட்டுவிடும் என்ற பயத்தில் பெற்ற தந்தை என்றும் பாராமல் அதே கத்தியால் கொடூரமாகக் கொலை செய்துள்ளார்.

இந்தக் கொடூரச் செயலைச் செய்துவிட்டுத் தலைமறைவான சீனிவாசன், அதிகாலையில் தனது தாய்க்கு போன் செய்து கொலையைப் பற்றித் தெரிவித்துள்ளார். இதைக் கேட்டு அதிர்ச்சியடைந்த அவரது தாய் மைதிலி, மாடிக்குச் சென்று பார்த்தபோது மருமகளும் பேத்தியும் ரத்த வெள்ளத்தில் சடலமாகக் கிடப்பதைக் கண்டு அலறியுள்ளார். அதிர்ஷ்டவசமாக, சீனிவாசனின் 16 வயது மகன் பிரணவ் அன்று இரவு தனது பாட்டியுடன் கீழ் தளத்தில் தங்கியிருந்ததால் உயிர் தப்பியுள்ளார்.

தகவலறிந்து சம்பவ இடத்திற்கு வந்த திரு.வி.க நகர் போலீசார், இருவரின் உடல்களையும் மீட்டு உடற்கூறு ஆய்விற்காக ஸ்டான்லி அரசு மருத்துவமனைக்கு அனுப்பி வைத்தனர். தலைமறைவாக இருந்த சீனிவாசனைத் தேடத் தனிப்படை அமைக்கப்பட்ட நிலையில், திருமுல்லைவாயல் பகுதியில் பதுங்கியிருந்த அவரைப் போலீசார் அதிரடியாகக் கைது செய்தனர். சந்தேகத்தாலும் மனநலப் பாதிப்பாலும் ஒரு குடும்பமே சிதைந்து போன இந்தச் சம்பவம் சென்னையில் பெரும் பரபரப்பை ஏற்படுத்தியுள்ளது.