உக்ரைன் பயணம்…. அடுத்த நாளே மரணம்…. ஈரான் வெளியிட்ட ‘ஹிட் லிஸ்ட்’ புகைப்படத்தில் இருந்த முகம்….!

ஈரான் வெளியிட்டதாகக் கூறப்படும் கொலைப் பட்டியலில் அமெரிக்க செனட்டர் லிண்ட்சே கிரஹாமின் புகைப்படம் சிலுவைக் குறியுடன் இடம்பெற்றுள்ள விவகாரம் உலகளவில் பெரும் பரபரப்பை ஏற்படுத்தியுள்ளது. அமெரிக்க அதிபர் டொனால்ட் ட்ரம்பின் நெருங்கிய கூட்டாளியும், அந்நாட்டின் வெளியுறவுக் கொள்கையில் செல்வாக்கு மிக்க குரலாக விளங்கியவருமான லிண்ட்சே கிரஹாம், உக்ரைனுக்குப் பயணம் மேற்கொண்ட மறுநாளே சந்தேகத்திற்கிடமான சூழ்நிலையில் உயிரிழந்தார். இந்த மரணம் நிகழ்ந்த சில தினங்களிலேயே, அவர் ஏற்கனவே ஈரானின் இலக்கில் இருந்ததை உறுதிப்படுத்தும் வகையிலான புகைப்படங்கள் வெளியாகி அதிர்ச்சியை ஏற்படுத்தியுள்ளன.

சமீபத்தில் காலமான ஈரானின் முன்னாள் உச்ச தலைவர் அயதுல்லா அலி கமேனியின் இறுதிச் சடங்கின்போது காட்சிப்படுத்தப்பட்ட சுவரொட்டிகளில் இந்த கொலைப் பட்டியல் இடம்பெற்றிருந்ததாகக் கூறப்படுகிறது. அந்தப் பட்டியலில் அமெரிக்க அதிபர் டொனால்ட் ட்ரம்ப், இஸ்ரேல் பிரதமர் பெஞ்சமின் நெதன்யாகு உள்ளிட்ட முக்கிய உலகத் தலைவர்களின் புகைப்படங்கள் வரிசைப்படுத்தப்பட்டுள்ளன. அதில், உக்ரைனில் ட்ரோன் தயாரிப்பு வசதி ஒன்றை ஆய்வு செய்த கையோடு மரணமடைந்த லிண்ட்சே கிரஹாமின் முகத்தின் மேல் ஒரு இலக்கு அல்லது சிலுவைக் குறி போடப்பட்டுள்ளது, அவரது மரணத்தில் ஈரானின் சதி இருக்குமோ என்ற பலத்த சந்தேகத்தை எழுப்பியுள்ளது.

இருப்பினும், இந்த விவகாரம் குறித்து ஈரான் தரப்பில் இருந்து இதுவரை எந்தவொரு அதிகாரப்பூர்வ விளக்கமும் அல்லது அறிக்கையும் வெளியிடப்படவில்லை. மறுபுறம், லிண்ட்சே கிரஹாமின் அலுவலகம் வெளியிட்டுள்ள செய்திக்குறிப்பில், அவர் சனிக்கிழமை மாலை திடீர் உடல்நலக்குறைவால் காலமானதாக மட்டுமே தெரிவிக்கப்பட்டுள்ளது. 20 ஆண்டுகளுக்கும் மேலாக செனட் சபையில் தென் கரோலினாவைப் பிரதிநிதித்துவப்படுத்திய கிரஹாம், ரஷ்யாவுக்கு எதிரான போரில் உக்ரைனுக்கு தீவிரமாக ஆதரவளித்தவர் என்பதால், அவரது மரணத்தின் பின்னணியில் பல்வேறு அரசியல் யூகங்கள் இறக்கைக் கட்டிப் பறக்கின்றன.

ஈரானியத் தலைமைக்கு எதிராகத் தொடர்ச்சியாகக் கடுமையான விமர்சனங்களை முன்வைத்து வந்த கிரஹாம், கமேனியை ஒரு சர்வாதிகாரி என்று பகிரங்கமாக முத்திரை குத்தியவர் என்பது குறிப்பிடத்தக்கது. மேலும், உக்ரைன் மோதலின் போது இந்தியா ரஷ்யாவிடமிருந்து கச்சா எண்ணெய் வாங்கியதையும் அவர் கடுமையாக எதிர்த்திருந்தார். ஈரானின் கொலைப் பட்டியலில் தான் முதலிடத்தில் இருப்பதாக அதிபர் ட்ரம்ப் பலமுறை எச்சரித்திருந்த நிலையில், தற்போது கிரஹாமின் மரணமும், அதைத் தொடர்ந்து வெளியாகியுள்ள இந்த ‘ஹிட் லிஸ்ட்’ புகைப்படமும் சர்வதேச அரசியலில் பெரும் பதற்றத்தையும் திகிலையும் ஏற்படுத்தியுள்ளது.