அமைச்சரவையில் திடீர் அதிரடி மாற்றம்?… ‘அம்மா’ பாணியை கையில் எடுக்கிறாரா முதன்மையானவர்?…. உள்கட்சி புகார்களுக்கு நடுவே சூசகமாக வெடித்த ஆதங்கம்…!

“யாராவது லஞ்சம் கேட்டால் என் பெயரைச் சொல்லுங்கள்” என்று மக்களிடம் நேரடியாக முழக்கமிட்டிருக்கிறார் முதன்மையானவர். தங்களின் மீது மக்கள் வைத்திருக்கும் அசைக்க முடியாத நம்பிக்கையைக் காப்பாற்ற வேண்டும் என்பதற்காகவே, ஆட்சிப் பொறுப்பேற்ற தொடக்கத்திலேயே “கொஞ்ச காலத்திற்காவது அனைவரும் தங்களின் ஐம்புலன்களையும் அடக்கிக்கொண்டு நேர்மையாக இருக்க வேண்டும்” எனத் தன் சகாக்களுக்கு அவர் முன்கூட்டியே எச்சரிக்கை விடுத்திருந்தார். ஆனால், துரதிர்ஷ்டவசமாக அவரது அரசவை பிரதானிகளையே அவரால் முழுமையாகக் கட்டுப்படுத்த முடியவில்லை என்பதுதான் தற்போதைய கள நிலவரம். முதன்மையானவரின் அறிவுரைகளை மீறி, அவரது சக அமைச்சர்கள் மற்றும் நிர்வாகிகள் மீது அடுத்தடுத்து வரும் புகார்களை எப்படிக் கையாள்வது என்று தெரியாமல் அவர் தவித்து வருவதாக அரசியல் வட்டாரங்களில் பேசப்படுகிறது.

இதற்கிடையில், ‘பெருத்த’ எதிர்பார்ப்புகளுடன் மாற்றுப் கட்சிகளில் இருந்து வந்து தஞ்சம் புகுந்திருக்கும் புதியவர்கள், கட்சிக்குள் தங்களுக்கு எனத் தனி லாபியை (குழுவை) உருவாக்கத் தொடங்கிவிட்டனர். ‘அம்மா’ பாணியில் அமைச்சரவையில் எப்போது வேண்டுமானாலும் அதிரடி மாற்றங்கள் நிகழலாம் என்ற பேச்சு பரவலாக இருப்பதால், மந்திரி பதவியைக் குறிவைத்து ‘வசந்தம் தேடி’ வந்தவர்கள் பகற்கனவில் மிதக்கிறார்கள். அதேநேரம், அமைச்சரவை மாற்றம் என்ற தகவல் கசிந்ததால், தற்போது பதவியில் இருக்கும் சிட்டிங் மந்திரிகள் சிலர் தங்களின் துறை சார்ந்த பணிகளில் அவசர அவசரமாகச் ‘சிந்திக்க’ (லாபம் பார்க்க) ஆரம்பித்துவிட்டதாகக் கூறப்படுகிறது. இந்த உள்கட்சி அரசியல் குழப்பங்களையும், அதிகார துஷ்பிரயோகங்களையும் முன்கூட்டியே கணித்துத்தான், முதன்மையானவர் பொதுவெளியில் “யாருக்கும் லஞ்சம் கொடுக்காதீர்கள்” என்று சூசகமாகத் தன் ஆதங்கத்தை வெளிப்படுத்தியுள்ளார் போலிருக்கிறது.