“திடீர் பிறந்தநாள் கொண்டாட்டம்…” கதவை திறந்து வைத்து தூங்கியது ஏன்…? செஞ்சி சிறுமி மாயம் வழக்கில் தாயிடம் 3-வது நாளாக சிபிசிஐடி கிடுக்கிப்பிடி…! பரபரப்பு சம்பவம்…!!

விழுப்புரம் மாவட்டம் செஞ்சி அருகே ஆலம்பூண்டியைச் சேர்ந்த 7 வயது சிறுமி ஹேமாவதி மாயமான வழக்கு, இரண்டு வாரங்களைக் கடந்து தமிழகத்தையே உலுக்கிக் கொண்டிருக்கும் நிலையில், வழக்கின் மிக முக்கிய மையப்புள்ளியான சிறுமியின் தாய் பவானியிடம் சிபிசிஐடி அதிகாரிகள் 3-வது நாளாகத் தீவிர விசாரணை நடத்தி வருகின்றனர்.

உள்ளூர் காவல்துறையினர் 10 நாட்கள் தேடியும் சிறுமி குறித்து எந்த ஆதாரமும் கிடைக்காததால், வழக்கு சிபிசிஐடி விசாரணைக்கு மாற்றப்பட்டது. சிபிசிஐடி டிஎஸ்பி கீதா தலைமையிலான அதிகாரிகள் சிறுமியின் தாய் பவானியை நேரில் வரவழைத்து அடுக்கடுக்கான கிடுக்கிப்பிடி கேள்விகளை முன்வைத்துள்ளனர். கடந்த 6 ஆண்டுகளாகக் கொண்டாடப்படாத பிறந்தநாளைச் சம்பவம் நடந்த முந்தைய நாள் இரவு திடீரெனக் கேக் வெட்டி விமரிசையாகக் கொண்டாடியது ஏன்?

வழக்கமாகத் தாயுடன் தூங்கும் சிறுமி அன்று மட்டும் ஏன் தனியாகப் படுக்க வைக்கப்பட்டாள்? காற்று வரட்டும் என வாசற்கதவைத் திறந்து வைத்துப் படுத்தது மற்றும் நள்ளிரவில் சிறுமி அலறிய சத்தம் தாயின் காதில் விழாதது எவ்வாறு? ஆலம்பூண்டியில் தங்கியிருந்துவிட்டுத் திடீரெனத் தப்பியோடிய சாமியார் சரவணனுடன் இருந்த தொடர்பு என்ன? என்பன போன்ற பல கேள்விகளால் சிபிசிஐடி துளைத்தெடுத்துள்ளது.

ஆரம்பத்தில் காவல்துறையிடம் கூறிய வாய்மொழி வாக்குமூலத்திற்கும், தற்போது சிபிசிஐடியிடம் அளித்த எழுத்துப்பூர்வமான தகவல்களுக்கும் இடையே கடுமையான முரண்பாடுகள் காணப்படுவதால், குடும்பத்திற்கு நெருக்கமானவர்களுக்கே இதில் தொடர்பு இருக்கலாம் என்ற கோணத்தில் விசாரணை நகர்ந்து வருகிறது. இதனிடையே 20-க்கும் மேற்பட்ட சிபிசிஐடி காவலர்கள் களமிறக்கப்பட்டு, செஞ்சி மற்றும் திண்டிவனம் தேசிய நெடுஞ்சாலைகளில் உள்ள சிசிடிவி காட்சிகளையும், 600-க்கும் மேற்பட்ட செல்போன் தரவுகளையும் தீவிரமாக ஆய்வு செய்து வருகின்றனர்.