தமிழகத்தில் உணவு விமர்சனம் (Food Review) என்றாலே பலருக்கும் முதலில் நினைவுக்கு வரும் பெயர் இர்ஃபான். தனது “Irfan’s View” யூடியூப் சேனல் மூலம் சிறிய தெருக்கடை முதல் உலகின் பல்வேறு நாடுகளில் உள்ள பிரபல உணவகங்கள் வரை சென்று, உணவுகளை சுவைத்து கோடிக்கணக்கான ரசிகர்களைப் பெற்றுள்ளார். இந்நிலையில், பக்ரீத் பண்டிகையை முன்னிட்டு அவர் “Irfans View Biryani” என்ற பெயரில் தனது சொந்த பிரியாணி பிராண்டை அறிமுகப்படுத்தினார். பிரீமியம் தரமான பாஸ்மதி அரிசி, உயர்தர மட்டன் மற்றும் ஸ்பெஷல் ரெசிபி எனப் பல்வேறு அம்சங்களுடன் விளம்பரப்படுத்தப்பட்ட இந்த பிரியாணி, அறிமுகமான முதல் நாளிலிருந்தே சமூக வலைதளங்களில் பெரும் விவாதப் பொருளானது.
இதற்குக் முக்கிய காரணம், இந்த பிரியாணிக்கு நிர்ணயிக்கப்பட்ட அசாத்திய விலையாகும். ஒரு பிரியாணி பார்சலின் விலை ரூ.3,650 முதல் ரூ.4,000 வரை விற்கப்பட்டதாகத் தகவல்கள் வெளியானதும் இணையவாசிகள் அதிர்ச்சியடைந்தனர். பிரீமியம் தரம் என்று கூறப்பட்டாலும், ஒரு பிரியாணிக்கு இவ்வளவு பெரிய தொகையா என்ற கேள்வி எழுந்தது. அதே நேரத்தில், அதிக விலை இருந்தபோதிலும் முன்பதிவு செய்யப்பட்ட அனைத்து ஆர்டர்களும் மிகக் குறுகிய காலத்திலேயே விற்றுத் தீர்ந்ததாகவும் கூறப்பட்டது, இந்த பிரியாணி மீதான ஆர்வத்தை மேலும் அதிகரித்தது.
வினோத்தின் அதிரடி விமர்சனமும் ஏமாற்றமும்
இந்நிலையில், இந்த பிரியாணியை வாங்கிச் சுவைத்த பிரபல யூடியூப் சேனலான ‘VB Fun Factory’-யின் வினோத் வெளியிட்ட ரிவ்யூ வீடியோ தற்பொழுது வைரலாகி வருகிறது. அந்த வீடியோவில், “இந்த பிரியாணி மோசம் என்று நான் சொல்லவில்லை, ஆனால் ரூ.3,650 கொடுத்து வாங்கும் அளவுக்கு இதில் விசேஷமாக எதுவும் இல்லை; சுவை சராசரியாகத்தான் இருந்தது” என்று கூறியுள்ளார். மேலும், பிரியாணியில் ஒரு கிலோவிற்கும் அதிகமாக மட்டன் துண்டுகள் இருக்கும் என்று கூறப்பட்ட நிலையில், தாங்கள் எடை போட்டுப் பார்த்தபோது வெறும் 700 கிராம் மட்டுமே இருந்ததாகக் குறிப்பிட்டு, விலையிலும் அளவிலும் தனக்கு ஏமாற்றமே மிஞ்சியது என வினோத் வருத்தப் பதிவை வெளியிட்டுள்ளார்.
“உங்களுக்கு சாப்பாடு பற்றி சொல்ல வேண்டியது இல்லை, உலகம் முழுக்க சுவைத்திருக்கிறீர்கள். ஆனால் இந்த விலை மக்களுக்கு ஏற்றதாக இல்லை; அடுத்த முறை விலையைக் குறைத்தால் இன்னும் நிறைய பேர் வாங்க முடியும்.” — வினோத் (VB Fun Factory)
ப்ளூ சட்டை மாறனுடன் ஒப்பிடப்படும் இர்ஃபான்
இந்த விமர்சனம் வெளியானதைத் தொடர்ந்து, இர்ஃபானை சினிமா விமர்சகர் ப்ளூ சட்டை மாறனுடன் ஒப்பிட்டுப் பலரும் கருத்து தெரிவித்து வருகின்றனர். ப்ளூ சட்டை மாறன் பல படங்களைக் கடுமையாக விமர்சித்துவிட்டு, அவரே ஒரு படத்தை இயக்கியபோது அது தோல்வியடைந்ததைச் சுட்டிக்காட்டி, “மற்றவர்களை விமர்சிப்பது எளிது; ஆனால் நாமே ஒரு பொருளை உருவாக்கும்போதுதான் அதன் சவால்கள் புரியும்” என்று நெட்டிசன்கள் பதிவிட்டு வருகின்றனர். இருப்பினும், மற்றொரு தரப்பினர் ஒரு சில விமர்சனங்களை வைத்து ஒரு தயாரிப்பை முழுமையாகத் தோல்வி என்று சொல்ல முடியாது என்றும், மற்ற ஹோட்டல் உணவுகளை இர்ஃபான் விமர்சித்தபோது மக்கள் அதை ஏற்றுக்கொண்டதைப்போல, இதையும் ஒரு பொதுவான விமர்சனமாகப் பார்க்க வேண்டும் என்றும் வாதிடுகின்றனர்.
தொடரும் சர்ச்சைகளும் இணைய மீம்ஸ்களும்
இந்த பிரியாணி விவகாரம் இர்ஃபானை மீண்டும் சர்ச்சைகளின் மையப்புள்ளியாக்கியுள்ளது. ஏற்கனவே அவர் பாராட்டிய உணவகம் ஒன்று சுகாதாரமற்ற முறையில் செயல்பட்டதாகக் கூறி அதிகாரிகள் நடவடிக்கை எடுத்தது, குழந்தையின் பாலினத்தை முன்கூட்டியே வெளிப்படுத்திய விவகாரம் மற்றும் சாலையோர மக்களுக்கு உணவளித்தபோது நடந்துகொண்ட விதம் எனப் பலமுறை அவர் ட்ரோல்களுக்கு உள்ளாகியுள்ளார். தற்பொழுது, “இந்த விலைக்கு பிரியாணியா இல்லை பைக் EMI-யா?” என்பது போன்ற காமெடி மீம்ஸ்கள் இணையத்தைக் கலக்கி வருகின்றன. இவருக்கு எதிராகக் கடுமையான விமர்சனங்கள் எழுந்தாலும், “பிரீமியம் தயாரிப்புக்கு பிரீமியம் விலை வைப்பதில் தவறில்லை” என இர்ஃபானின் ரசிகர்கள் அவருக்கு ஆதரவாகக் களம் இறங்கியுள்ளனர். எது எப்படியோ, பாராட்டுகளை விட சர்ச்சைகளையே அதிகம் சந்தித்து வரும் இர்ஃபானின் பிரியாணிதான் தற்போது தமிழக இணைய உலகின் ஹாட் டாபிக்!