உலகளாவிய டிஜிட்டல் மற்றும் நிதிச் சந்தைகளை உலுக்கும் வகையில், ஹார்முஸ் நீரிணைக்கு அடியில் செல்லும் சர்வதேச கடலடி இணைய கேபிள்களைப் பயன்படுத்துவதற்காகக் கூகுள், மைக்ரோசாப்ட், மெட்டா மற்றும் அமேசான் உள்ளிட்ட உலகின் முன்னணி தொழில்நுட்ப நிறுவனங்களிடம் இருந்து பெருந்தொகை கட்டணம் வசூலிக்க ஈரான் அரசு திட்டமிட்டு வருகிறது. ஈரான் அரசுடன் தொடர்புடைய ஊடகங்கள் வழியாகக் கசிந்துள்ள இத்தகவலை, அந்நாட்டு இராணுவ செய்தித் தொடர்பாளர் இப்ராஹிம் ஸோல்ஃபகாரியும் தனது சமூக ஊடகப் பதிவு மூலம் உறுதிப்படுத்தியுள்ளார். உலக நாடுகள் மற்றும் தொழில்நுட்ப நிறுவனங்கள் தங்களது கோரிக்கைகளுக்கு ஒத்துழைக்க மறுத்தால், இணைய வேகம் கடுமையாகப் பாதிக்கப்படும் என்றும், பிராந்தியம் தழுவிய இணைய சேவை முடக்கம் ஏற்படும் என்றும் ஈரானிய ஊடகங்கள் எச்சரித்துள்ளன.
ஈரானிய புரட்சிகரப் பாதுகாப்புப் படையுடன் தொடர்புடைய ஊடகங்கள் வெளியிட்டுள்ள தகவல்களின்படி, இந்தத் திட்டத்தின் கீழ் முக்கிய தொழில்நுட்ப நிறுவனங்கள் அனைத்தும் ஈரானிய சட்டங்களுக்குக் கட்டுப்பட்டு நடக்க வேண்டும் என்பதும், கடலடி கேபிள் ஆபரேட்டர்கள் உரிய உரிமக் கட்டணங்களைச் செலுத்த வேண்டும் என்பதும் கட்டாயமாக்கப்படவுள்ளது. அத்துடன், இந்த கேபிள்களின் பழுதுபார்ப்பு மற்றும் பராமரிப்பு உரிமைகளை ஈரானிய நிறுவனங்களுக்கே பிரத்தியேகமாக ஒப்படைக்க வேண்டும் எனவும் ஈரான் நிபந்தனை விதித்துள்ளது. இருப்பினும், அமெரிக்கா ஏற்கனவே விதித்துள்ள பொருளாதாரத் தடைகள் காரணமாக, அமெரிக்க நிறுவனங்கள் ஈரானுக்கு நேரடியாகப் பணம் செலுத்துவதில் கடுமையான சிக்கல்கள் இருப்பதால், இந்த புதிய விதிமுறைகளை ஈரான் எவ்வாறு நடைமுறைப்படுத்தப் போகிறது என்பதில் இன்னும் தெளிவற்ற சூழலே நிலவுகிறது.
உலகளாவிய டிஜிட்டல் இணைப்பின் அடித்தளமாக விளங்கும் இந்த கடலடி கேபிள்கள் தான் உலகின் பெரும்பாலான இணையம் மற்றும் தரவுப் போக்குவரத்தைக் கொண்டு செல்கின்றன. இதனால், ஹார்முஸ் நீரிணையில் ஏற்படும் எந்தவொரு சிறு இடையூறும் வங்கி அமைப்புகள், இராணுவத் தகவல் தொடர்பு, செயற்கை நுண்ணறிவு தொழில்நுட்பங்கள், நிதி வர்த்தகம் மற்றும் எல்லை தாண்டிய உலகளாவிய பரிவர்த்தனைகள் ஆகியவற்றை முடக்கி உலகத்தையே ஸ்தம்பிக்க வைக்கும் வல்லமை கொண்டது. ஈரான் தொடர்பான நீண்டகால பாதுகாப்பு கவலைகள் காரணமாக, சர்வதேச நிறுவனங்கள் வரலாற்று ரீதியாக பெரும்பாலான கேபிள்களை ஓமன் நாட்டின் கடல் எல்லைப் பாதை வழியாகவே அமைத்திருந்தாலும், ‘ஃபால்கன்’ (Falcon) மற்றும் ‘கலாஃப் பிரிட்ஜ் இன்டர்நேஷனல்’ (Gulf Bridge International) ஆகிய இரு முக்கிய கேபிள்கள் ஈரானிய எல்லைக்குட்பட்ட கடல் பகுதி வழியாகவே செல்கின்றன என்பது குறிப்பிடத்தக்கது.
இந்த கேபிள்களுக்கு ஏதேனும் பாதிப்பு ஏற்பட்டால், ஈரானின் அண்டை நாடுகள் கடுமையான இணையத் துண்டிப்புகளைச் சந்திக்க நேரிடுவதோடு, இந்தியாவின் இணையப் போக்குவரத்திலும் பெரும் பகுதி முடங்கும் அபாயம் உள்ளது. மேலும், ஐரோப்பாவிற்கும் ஆசியாவிற்கும் இடையேயான நிதி வர்த்தகம் மற்றும் எல்லை தாண்டிய பரிவர்த்தனைகளும் கணிசமாகக் குறையக்கூடும். ஆனால், ஈரானின் இந்த முடிவு சர்வதேச சட்டத்திற்கு உட்பட்டது தான் என்று சில நிபுணர்கள் சுட்டிக்காட்டுகின்றனர். 1982-ஆம் ஆண்டு ஐக்கிய நாடுகள் மன்றத்தின் கடல் சட்ட மாநாட்டை மேற்கோள் காட்டி, தங்களுக்குக் கட்டணம் விதிக்கும் உரிமை இருப்பதாக ஈரானிய ஊடகங்கள் வாதிடுகின்றன. மேலும், சூயஸ் கால்வாய் வழியாகச் செல்லும் கடலடி கேபிள்களுக்குப் போக்குவரத்து மற்றும் உரிமக் கட்டணங்களை வசூலிக்கும் எகிப்து நாட்டை இதற்கு ஒரு சிறந்த உதாரணமாகவும் ஈரான் காட்டியுள்ளது.