ஈரானின் புதிய உச்ச தலைவர் மொஜ்தபா கமேனியின் நிலை குறித்த மர்மம், அவர் ஈராக் மக்களுக்கு நன்றி தெரிவித்து வெளியிட்ட அறிக்கையினால் மேலும் அதிகரித்துள்ளது. இஸ்ரேல் மற்றும் அமெரிக்காவின் தாக்குதல்களுக்குப் பிறகு, மொஜ்தபா கமேனி உயிருடன் இல்லை அல்லது கடுமையான உடல்நலக் குறைவால் பாதிக்கப்பட்டுள்ளார் என்று அமெரிக்க அதிபர் டொனால்ட் ட்ரம்ப் பகிரங்கமாகக் குற்றம் சாட்டியிருந்தார். இதற்குப் பதிலடி கொடுக்கும் விதமாகவே ஈரானிய அரசு ஊடகங்கள் இந்த நன்றி அறிவிப்பை வெளியிட்டுள்ளன. இருப்பினும், இந்த அறிக்கை வெறும் எழுத்து வடிவில் மட்டுமே உள்ளதே தவிர, அவர் நேரில் தோன்றிப் பேசிய வீடியோ ஆதாரங்கள் எதுவும் இதுவரை வெளியிடப்படவில்லை.
கடந்த மார்ச் 9-ஆம் தேதி தனது தந்தை அயதுல்லா அலி கமேனியின் மறைவுக்குப் பிறகு பதவியேற்ற மொஜ்தபா, இதுவரை ஒருமுறை கூட பொதுவெளியில் தோன்றவில்லை என்பது குறிப்பிடத்தக்கது. அவர் ஆற்றியதாகக் கூறப்படும் உரைகள் மற்றும் நவ்ரூஸ் பண்டிகை செய்திகள் அனைத்தும் அரசுத் தொலைக்காட்சி தொகுப்பாளர்களால் மட்டுமே வாசிக்கப்பட்டுள்ளன. ஈரானின் உண்மையான அதிகார மையம் தற்போது யாரிடம் உள்ளது என்ற சந்தேகம் சர்வதேச உளவுத்துறையினரிடையே நீடித்து வரும் நிலையில், ட்ரம்பின் கூற்றுகள் உண்மையா அல்லது ஈரான் திட்டமிட்டு உண்மையை மறைக்கிறதா என்ற விவாதம் மேலெழுந்துள்ளது.
மறுபுறம், மேற்காசியாவில் நிலவும் போர் பதற்றத்தைத் தணிக்க பாகிஸ்தான் தீவிர முயற்சிகளை மேற்கொண்டு வருகிறது. சவூதி அரேபியா, துருக்கி மற்றும் எகிப்து ஆகிய நாடுகளுடன் ஆலோசித்த பிறகு, வாஷிங்டன் மற்றும் தெஹ்ரான் இடையே நேரடிப் பேச்சுவார்த்தையை இஸ்லாமாபாத்தில் நடத்த பாகிஸ்தான் வெளியுறவு அமைச்சர் இஷாக் டார் விருப்பம் தெரிவித்துள்ளார். எனினும், இந்த அமைதிப் பேச்சுவார்த்தையில் பங்கேற்க அமெரிக்காவும் ஈரானும் அதிகாரப்பூர்வமாகச் சம்மதம் தெரிவித்துள்ளனவா என்பது குறித்த தெளிவான தகவல்கள் இன்னும் வெளியாகவில்லை.