“ஈரான் மண்ணில் கால் வைத்தால் நரகம் தான்”… சவப்பெட்டிகளுடன் தயார்… அமெரிக்க வீரர்களுக்கு ஈரான் விடுத்த பகிரங்க ‘மரண’ எச்சரிக்கை….!

மத்திய கிழக்கில் ஈரான் மற்றும் அமெரிக்கா-இஸ்ரேல் இடையிலான போர் ஒரு மாதத்தைக் கடந்து தீவிரமடைந்துள்ள நிலையில், அமெரிக்கா தற்போது ஈரானுக்குள் தரைவழித் தாக்குதலை நடத்தத் திட்டமிட்டு வருவதாகத் தகவல்கள் வெளியாகியுள்ளன. அமெரிக்க அதிபர் டொனால்ட் டிரம்ப், ஈரான் சரணடைய வேண்டும் என்று தொடர்ந்து வலியுறுத்தி வரும் சூழலில், ஈரான் அதனை முற்றிலுமாக நிராகரித்துள்ளது. தாய்நாட்டைப் பாதுகாக்க இறுதிவரை போராடுவோம் என்றும், ஆக்கிரமிப்பாளர்களுக்குத் தக்க பதிலடி கொடுக்கப்படும் என்றும் ஈரான் ராணுவம் உறுதியளித்துள்ளது.

அமெரிக்காவின் ‘தி வால் ஸ்ட்ரீட் ஜர்னல்’ வெளியிட்டுள்ள செய்தியின்படி, மத்திய கிழக்கில் தனது படை வலிமையை அதிகரிக்க அமெரிக்கா முடிவு செய்துள்ளது. ஏற்கனவே ஆயிரக்கணக்கான கடற்படை மற்றும் பாராசூட் வீரர்கள் அப்பகுதியில் நிலைநிறுத்தப்பட்டுள்ள நிலையில், கூடுதலாக 10,000 வீரர்களை அனுப்பத் திட்டமிடப்பட்டுள்ளது. அதிபர் டிரம்ப் இன்னும் அதிகாரப்பூர்வ அனுமதி வழங்கவில்லை என்றாலும், இந்த நகர்வுகள் அனைத்தும் ஈரானுக்குள் நேரடியாக நுழைந்து தரைவழித் தாக்குதல் நடத்துவதற்கான முன்னோட்டமாகவே பார்க்கப்படுகிறது.

இந்தச் சூழலில், ஈரானின் முன்னணி ஆங்கில நாளிதழான “டெஹ்ரான் டைம்ஸ்” தனது முதல் பக்கத்தில் அமெரிக்காவிற்கு மிகக்கடுமையான எச்சரிக்கையை விடுத்துள்ளது. “நரகத்திற்கு வருக” (Welcome to Hell) என்ற தலைப்பில் வெளியான அந்தச் செய்தியில், ஈரான் மண்ணில் காலடி வைக்கும் அமெரிக்க வீரர்கள் உயிருடன் திரும்ப மாட்டார்கள் என்றும், அவர்கள் சவப்பெட்டியில் தான் தாய்நாட்டிற்குச் செல்ல நேரிடும் என்றும் பகிரங்கமாக எச்சரிக்கப்பட்டுள்ளது. இது இரு நாடுகளுக்கும் இடையிலான வார்த்தைப் போரை உச்சக்கட்டத்திற்கு கொண்டு சென்றுள்ளது.

தரைவழித் தாக்குதல் நடத்தப்பட்டால், போர் என்பது ஈரான் எல்லைக்குள் மட்டும் முடிந்துவிடாது என்று அந்த நாட்டு ராணுவம் எச்சரித்துள்ளது. ஈரான் மீது தாக்குதல் தொடங்கினால், ஏமனில் உள்ள ஹவுதி கிளர்ச்சியாளர்கள் மூலம் செங்கடலில் கப்பல் போக்குவரத்தை முடக்குவோம் என்றும், சர்வதேச வர்த்தகப் பாதைகளைத் தாக்குவோம் என்றும் ஈரான் தெரிவித்துள்ளது. இதன் மூலம் இந்தப் போர் ஒரு பிராந்திய மோதலாக மாறி, உலகப் பொருளாதாரத்தையே பாதிக்கும் அபாயம் ஏற்பட்டுள்ளது.

தற்போது மத்திய கிழக்கில் நிலவும் இந்த அசாதாரண சூழல் உலக நாடுகளிடையே பெரும் அச்சத்தை ஏற்படுத்தியுள்ளது. ஈரானின் பதிலடித் தாக்குதல்கள் மற்றும் ஹவுதிகளின் தலையீடு ஆகியவை போரை மேலும் சிக்கலாக்கியுள்ளன. அமெரிக்கா தனது கூடுதல் படைகளை அனுப்பும் பட்சத்தில், அது ஒரு முழு அளவிலான தரைப்போர் தொடங்குவதற்கு வழிவகுக்கும் என்பதில் சந்தேகமில்லை.