ஒரே நாளில் குவைத், துபாய் மீது ஏவுகணை மழை… கொத்து கொத்தாக அமெரிக்க வீரர்கள் பலி?… ஈரான் அதிபர் விடுத்த நடுங்க வைக்கும் வார்னிங்…!

மத்திய கிழக்கில் போர் மேகங்கள் சூழ்ந்துள்ள நிலையில், ஈரான் இன்று குவைத் மற்றும் ஐக்கிய அரபு அமீரகத்தின் துபாய் நகரில் உள்ள அமெரிக்க ராணுவத் தளங்களை இலக்கு வைத்து அதிரடித் தாக்குதல் நடத்தியுள்ளதாகத் தகவல்கள் வெளியாகியுள்ளன. இந்தத் தாக்குதலை உறுதிப்படுத்தியுள்ள ஈரான் அதிபர் மசூத் பெசேஷ்கியான், அமெரிக்காவிற்கும் அதன் நட்பு நாடுகளான அரபு நாடுகளுக்கும் கடும் எச்சரிக்கை விடுத்துள்ளார். குறிப்பாக, துபாயில் உள்ள அமெரிக்காவின் இரண்டு முக்கிய பதுங்கு குழிகள் மீது ஈரானின் ஏவுகணைகள் துல்லியமாகத் தாக்கியதில், அங்கு தங்கியிருந்த நூற்றுக்கணக்கான அமெரிக்க வீரர்கள் உயிரிழந்திருக்கலாம் என்ற அச்சம் எழுந்துள்ளது.

அமெரிக்கா மற்றும் இஸ்ரேல் ஈரான் மீது போர் தொடுத்து ஒரு மாதம் நிறைவடைந்துள்ள நிலையில், ஈரான் தனது அண்டை நாடுகளுக்கு விடுத்துள்ள எச்சரிக்கை மிக முக்கியமானது. தங்கள் மீதான தாக்குதல்களுக்கு அரபு நாடுகள் தங்களின் நிலத்தைப் பயன்படுத்த அனுமதித்தால், அந்த நாடுகளின் பொருளாதார மையங்கள் மற்றும் உள்கட்டமைப்புகள் மீது கடும் பதிலடி கொடுக்கப்படும் என்று அதிபர் பெசேஷ்கியான் தெளிவுபடுத்தியுள்ளார். சவுதி அரேபியா, கத்தார் மற்றும் ஓமன் போன்ற நாடுகள் அமெரிக்காவின் நட்பு நாடுகளாக இருப்பதால், போர் பரவும் அபாயம் தற்போது பலமடங்கு அதிகரித்துள்ளது.

துபாயில் நடத்தப்பட்ட தாக்குதல் குறித்து ஈரானின் புரட்சிகர பாதுகாப்புப் படை கூறுகையில், 500-க்கும் மேற்பட்ட அமெரிக்க வீரர்கள் இருந்த தளங்கள் மீது ட்ரோன் மற்றும் ஏவுகணைகள் மூலம் தாக்குதல் நடத்தப்பட்டதாகவும், மீட்புப் பணிகளுக்காக ஏராளமான ஆம்புலன்ஸ்கள் அங்கு குவிக்கப்பட்டதாகவும் தெரிவித்துள்ளது. அமெரிக்க வீரர்கள் இந்தப் பிராந்தியத்தை விட்டு வெளியேறாவிட்டால், இது அவர்களின் கல்லறையாக மாறும் என்றும் ஈரான் ராணுவம் ஆவேசமாகத் தெரிவித்துள்ளது. இந்தத் தாக்குதல் ஈரானின் பதிலடி கொடுக்கும் திறனை உலகிற்கு நிரூபிக்கும் முயற்சியாகப் பார்க்கப்படுகிறது.

இருப்பினும், ஈரானின் இந்தக் கூற்றை அமெரிக்காவின் மத்திய கட்டளைப்படை (US Central Command) திட்டவட்டமாக மறுத்துள்ளது. துபாயில் அமெரிக்கப் படையினர் எவரும் தாக்கப்படவில்லை என்றும், ஈரான் தனது ராணுவ இழப்புகளை மறைக்க சமூக வலைதளங்களில் போலிச் செய்திகளைப் பரப்பி வருவதாகவும் அமெரிக்கா குற்றம் சாட்டியுள்ளது. இரு நாடுகளும் முன்னுக்குப் பின் முரணான தகவல்களை வெளியிட்டு வரும் நிலையில், மத்திய கிழக்கு நாடுகளில் நிலவும் இந்த உச்சக்கட்ட பதற்றம் உலக நாடுகளிடையே பெரும் கவலையை ஏற்படுத்தியுள்ளது.