செய்திச் சேனல்களுக்கு விழுந்த பலத்த அடி…. டிஆர்பி-க்கு (TRP) ஆப்பு வைத்த மத்திய அமைச்சகம்…. அடுத்த 4 வாரங்களுக்கு இனி இது கிடையாது…!

ஈரான் – இஸ்ரேல் இடையிலான போர்ச் சூழலை அடிப்படையாக வைத்து சில செய்தித் தொலைக்காட்சிகள் தேவையற்ற பீதியையும், யூகத்தின் அடிப்படையிலான செய்திகளையும் பரப்பி வருவதாகப் புகார்கள் எழுந்தன. இதனைத் தொடர்ந்து, செய்தித் சேனல்களுக்கான டிஆர்பி (TRP) ரேட்டிங் முறையை அடுத்த 4 வாரங்களுக்கு அல்லது மறு உத்தரவு வரும் வரை நிறுத்தி வைப்பதாக மத்திய தகவல் மற்றும் ஒலிபரப்புத் துறை அமைச்சகம் அதிரடி உத்தரவு பிறப்பித்துள்ளது.

இந்த உத்தரவின் பின்னணியில், போர் தொடர்பான செய்திகளை மிகைப்படுத்தி வெளியிடுவதன் மூலம் பொதுமக்கள், குறிப்பாகப் பாதிக்கப்பட்ட பகுதிகளில் உறவினர்களைக் கொண்டிருப்பவர்கள் மத்தியில் தேவையற்ற அச்சம் உருவாக்கப்படுவதாக அரசு கருதுகிறது. செய்திகளில் நம்பகத்தன்மைக்கு முக்கியத்துவம் அளிக்காமல், வெறும் டிஆர்பி போட்டிக்காகச் சேனல்கள் பரபரப்பைக் கிளப்புவதைத் தடுக்கும் நோக்கில் இந்த நடவடிக்கை எடுக்கப்பட்டுள்ளது.

இந்தியாவில் ‘பார்க்’ (BARC) அமைப்பு மூலம் செய்தித் சேனல்களின் பார்வையாளர் எண்ணிக்கை கணக்கிடப்பட்டு வாரந்தோறும் டிஆர்பி புள்ளிகள் வெளியிடப்படும். இந்த தரவரிசையைப் பொறுத்தே விளம்பர வருவாய் தீர்மானிக்கப்படுவதால், சேனல்கள் போட்டி போட்டுக்கொண்டு பரபரப்பான தலைப்புகளுடன் செய்திகளை வெளியிடுகின்றன. தற்போது இந்த ரேட்டிங் நிறுத்தி வைக்கப்பட்டுள்ளதால், சேனல்களின் விளம்பர வருவாய் பாதிக்கப்பட வாய்ப்புள்ளது.

மத்திய அரசின் இந்த நடவடிக்கை ஊடகத் துறையில் பெரும் விவாதத்தைக் கிளப்பியுள்ளது. ஒருபுறம் செய்திச் சேனல்கள் பொறுப்புடன் செயல்பட இது உதவும் என்று வரவேற்பு எழுந்தாலும், மறுபுறம் இது ஊடக சுதந்திரத்தின் மீது மறைமுகமான பாதிப்பை ஏற்படுத்தக்கூடும் என்றும் கருத்துக்கள் பகிரப்படுகின்றன. இருப்பினும், போர் போன்ற இக்கட்டான காலங்களில் ஊடகங்கள் பொறுப்புணர்வோடு செய்திகளை வழங்க வேண்டும் என்பதையே இந்த இடைக்காலத் தடை வலியுறுத்துகிறது.