வளைகுடா பிராந்தியத்தில் போர் மேகங்கள் இன்னும் முழுமையாகக் கலைந்துவிடாத நிலையில், ஈரானின் தேசிய பாதுகாப்பு கவுன்சில் விடுத்துள்ள அதிரடி அறிவிப்பு சர்வதேச அரங்கில் பெரும் பரபரப்பை ஏற்படுத்தியுள்ளது. உலக வர்த்தகத்தின் உயிர்நாடியாகக் கருதப்படும் ஹார்முஸ் ஜலசந்தி இனி ஒரு சாதாரண வழித்தடம் அல்ல, அது ஈரானின் முழு கட்டுப்பாட்டில் உள்ள மண்டலம் என ஈரான் அறிவித்துள்ளது. போர் நிறுத்தப் பேச்சுவார்த்தைகள் ஒருபுறம் நடந்தாலும், எந்த நேரத்திலும் மோதல் வெடிக்கலாம் என்ற சூழலில், ஹார்முஸ் பகுதியைத் தனது ‘செக்-மேட்’ வியூகத்தின் மையப்புள்ளியாக ஈரான் மாற்றியுள்ளது.
ஈரானின் இந்த புதிய விதிகளின்படி, இனி ஹார்முஸ் வழியாகச் செல்லும் ஒவ்வொரு கப்பலும் ஈரானின் தீவிர கண்காணிப்புக்கு உட்படுத்தப்படும். குறிப்பாக, முன் அனுமதி இன்றி எந்தவொரு கப்பலும் இந்த வழித்தடத்தைப் பயன்படுத்த முடியாது என்ற நிபந்தனை விதிக்கப்பட்டுள்ளது. கப்பலின் முழு விவரங்களையும் சமர்ப்பித்து, ஈரானிடம் இருந்து ‘ட்ரான்சிட் சர்டிபிகேட்’ பெற்றால் மட்டுமே அந்தப் பாதையைக் கடக்க முடியும். இது சர்வதேசக் கடல்வழிப் போக்குவரத்தில் ஈரானின் ஆதிக்கத்தை உறுதிப்படுத்தும் ஒரு முக்கிய நடவடிக்கையாகப் பார்க்கப்படுகிறது.
மேலும், கடல் பாதுகாப்பு மற்றும் சுற்றுச்சூழல் பாதுகாப்பு சேவைகளை வழங்குவதாகக் கூறி, ஹார்முஸைக் கடக்கும் கப்பல்களுக்குத் தனி சேவைக் கட்டணம் வசூலிக்கப்போவதாகவும் ஈரான் அறிவித்துள்ளது. இது கிட்டத்தட்ட ஒரு சர்வதேசச் சுங்கச்சாவடி போலச் செயல்படத் தொடங்கியுள்ளது. ஒருவேளை அமெரிக்கா தனது பொருளாதாரத் தடைகள் மூலம் ஈரான் துறைமுகங்களுக்கு முட்டுக்கட்டை போட்டால், அது போர் நிறுத்த மீறலாகக் கருதப்படும் என்றும், அத்தகைய சூழலில் ஜலசந்தியைத் திறக்கும் பேச்சுக்கே இடமில்லை என்றும் ஈரான் மிகக் கடுமையாக எச்சரித்துள்ளது.
உலக எரிசக்தி தேவையைப் பூர்த்தி செய்யும் கச்சா எண்ணெய் போக்குவரத்தில் ஹார்முஸ் ஜலசந்தி மிக முக்கியப் பங்கு வகிக்கிறது. ஏற்கெனவே இந்தியக் கப்பல் மீது தாக்குதல் நடத்தப்பட்ட சம்பவத்தால் பதற்றம் நிலவி வரும் நிலையில், ஈரானின் இந்த ஒருதலைப்பட்சமான கட்டுப்பாடுகள் உலகளாவிய பெட்ரோல் விலை மற்றும் பொருளாதாரத்தை நேரடியாகப் பாதிக்கும் அபாயம் உள்ளது. அமெரிக்காவின் அடுத்தகட்ட நகர்வு மற்றும் ஈரான் முன்வைத்துள்ள புதிய விதிமுறைகள் மத்திய கிழக்கு நாடுகளின் அமைதியையும், சர்வதேச வர்த்தகத்தின் எதிர்காலத்தையும் தீர்மானிக்கும் காரணியாக மாறியுள்ளது.