“”மேல கைய வெச்ச அமெரிக்காவே நரகமாகும்”… ட்ரம்ப்பின் 48 மணி நேர கெடுவுக்கு ஈரான் பதிலடி… உலக நாடுகளுக்கு பேராபத்து…!

ஈரான் மற்றும் அமெரிக்கா இடையிலான மோதல் தற்போது உச்சக்கட்டத்தை எட்டியுள்ளது. ஹார்மஸ் நீர்வழிப்பாதையை அடுத்த 48 மணி நேரத்திற்குள் திறக்காவிட்டால், ஈரானின் மின்சாரக் கட்டமைப்புகளைத் தாக்கி “நரகத்தைக் காட்டுவோம்” என்று அமெரிக்க அதிபர் ட்ரம்ப் கடும் எச்சரிக்கை விடுத்துள்ளார். ட்ரம்ப் வழங்கிய 10 நாட்கள் கெடு முடிவடைய இன்னும் இரண்டு நாட்களே உள்ள நிலையில், இந்த எச்சரிக்கை மத்திய கிழக்கில் பெரும் பரபரப்பை ஏற்படுத்தியுள்ளது. அமெரிக்காவின் இந்த மிரட்டலுக்குப் பதிலடி கொடுத்துள்ள ஈரான், தங்கள் மீது தாக்குதல் நடத்தப்பட்டால் ஒட்டுமொத்த வளைகுடாப் பகுதியையுமே அமெரிக்கா மற்றும் இஸ்ரேலுக்கு நரகமாக மாற்றிவிடுவோம் என எச்சரித்துள்ளது.

ஈரானின் புரட்சிகர இஸ்லாமிய பாதுகாப்புப் படையின் செய்தித் தொடர்பாளர் இப்ராஹிம் ஸோல்ஃபகாரி இது குறித்துப் பேசுகையில், ட்ரம்ப்பின் மிரட்டல்கள் அமெரிக்காவின் இயலாமையையும் முட்டாள்தனத்தையுமே வெளிப்படுத்துவதாகச் சாடியுள்ளார். ஈரானைத் தோற்கடித்துவிடலாம் என்ற மாயை அமெரிக்காவையும் இஸ்ரேலையும் சகதியில் சிக்க வைக்கும் என்றும், போர் மூண்டால் நரகத்தின் கதவுகள் அவர்களுக்காகவே திறக்கப்படும் என்றும் அவர் காரசாரமாகத் தெரிவித்துள்ளார். அமெரிக்கா தனது தாக்குதலை விரிவுபடுத்தினால், மத்திய கிழக்கு பிராந்தியத்தில் உள்ள அமெரிக்க ராணுவ தளவாடங்கள் மீது பேரழிவை ஏற்படுத்தும் வகையிலான பதிலடி கொடுக்கப்படும் என்பதில் ஈரான் உறுதியாக உள்ளது.

இதற்கிடையில், இஸ்ரேல் தரப்பிலிருந்தும் போர் மேகங்கள் சூழத் தொடங்கியுள்ளன. ஈரானின் மின்சார உட்கட்டமைப்புகள் மீது தாக்குதல் நடத்த இஸ்ரேல் ராணுவம் முழுத் தயார் நிலையில் இருப்பதாகவும், அமெரிக்காவின் இறுதி ஒப்புதலுக்காக மட்டுமே காத்திருப்பதாகவும் தகவல்கள் வெளியாகியுள்ளன. ஹார்மஸ் நீர்வழிப்பாதையைத் திறப்பது மற்றும் அமைதி ஒப்பந்தத்தில் கையெழுத்திடுவது போன்ற நிபந்தனைகளுக்கு ஈரான் பணிய மறுப்பதால், ஒரு தீவிரமான ராணுவ நடவடிக்கைக்கு இரு நாடுகளும் கைகோர்த்துள்ளன. ஆனால், அமெரிக்காவின் ஒருதலைபட்சமான பரிந்துரைகளை ஒருபோதும் ஏற்கப்போவதில்லை என்பதில் ஈரான் திட்டவட்டமாக உள்ளது.

தற்போது உலக நாடுகளின் கவனம் முழுவதும் ஹார்மஸ் நீர்வழிப்பாதை மீதே உள்ளது. உலகின் கச்சா எண்ணெய் விநியோகத்தில் சுமார் 20 சதவீதத்தைக் கொண்டுள்ள இந்த வழித்தடம், ஈரான் மீதான ராணுவ நடவடிக்கைக்குப் பிறகு மூடப்பட்டுள்ளது. இது சர்வதேச எரிசக்தி சந்தையில் பெரும் கவலையை ஏற்படுத்தியுள்ளது. அமெரிக்க-இஸ்ரேல் கூட்டணி மற்றும் ஈரான் இடையிலான இந்த மோதல் ஆறாவது வாரத்தை எட்டியுள்ள நிலையில், அடுத்த 48 மணி நேரத்தில் போர் வெடிக்குமா அல்லது அமைதி திரும்புமா என்ற பதற்றத்தில் ஒட்டுமொத்த வளைகுடா நாடுகளும் உறைந்து போயுள்ளன.