தமிழக அரசியலில் நடிகர் விஜய்யின் தமிழக வெற்றிக் கழகம் ஏற்படுத்தி வரும் தாக்கம் குறித்து வெளியாகியுள்ள உளவுத்துறை அறிக்கை, டெல்லி பாஜக மேலிடத்தை பெரும் அதிர்ச்சிக்குள்ளாக்கியுள்ளது. வரவிருக்கும் சட்டமன்றத் தேர்தலில் திமுக மற்றும் தவெக இடையேதான் நேரடிப் போட்டி இருக்கும் என்றும், விஜய்யின் அரசியல் செல்வாக்கு அதிமுக மற்றும் பாஜக கூட்டணியைப் பின்னுக்குத் தள்ளி வருவதாகவும் அந்த அறிக்கையில் குறிப்பிடப்பட்டுள்ளது. குறிப்பாக, ‘அரசியல் எதிரி திமுக, கொள்கை எதிரி பாஜக’ என்ற விஜய்யின் தெளிவான நிலைப்பாடு மக்களிடையே கவனத்தைப் பெற்றுள்ள நிலையில், அவரது செல்வாக்கு நாளுக்கு நாள் அதிகரித்து வருவது டெல்லி தலைமையைக் கவலை கொள்ளச் செய்துள்ளது.
மத்திய அமைச்சர் அமித் ஷா அண்மையில் தமிழகம் வந்திருந்தபோது, கூட்டணிக் கட்சித் தலைவரான எடப்பாடி பழனிசாமி அவரைச் சந்திக்காதது பாஜக தலைமையிடம் ஏற்கனவே அதிருப்தியை ஏற்படுத்தியிருந்தது. இந்தச் சூழலில், விஜய்யின் ‘ஜனநாயகன்’ திரைப்படத் தணிக்கை விவகாரம் அவருக்குப் பரவலான பொதுமக்களின் அனுதாபத்தைப் பெற்றுத் தந்துள்ளது. மேலும், அதிமுக மற்றும் பாஜக கூட்டணியில் இருந்து பிரிந்து சென்ற ஓ.பன்னீர்செல்வம், டி.டி.வி. தினகரன் போன்றவர்களைத் தனது பக்கம் இழுக்க விஜய் காய் நகர்த்தி வருவது, அதிமுக-பாஜக கூட்டணியின் வாக்கு வங்கியைப் பெரிய அளவில் பாதிக்கும் என்று உளவுத்துறை எச்சரித்துள்ளது.
இந்தத் திடீர் அரசியல் மாற்றங்களால் மத்திய அமைச்சர் அமித் ஷா கடும் அதிருப்தியில் இருப்பதாகத் தகவல்கள் தெரிவிக்கின்றன. குறிப்பாக, அதிமுக – பாஜக கூட்டணியில் நிலவும் உள்கட்சிப் பூசல்களும், தொகுப்புப் பணிகளில் ஏற்பட்டுள்ள தொய்வும் விஜய்க்குச் சாதகமாக முடிந்துள்ளதாகக் கருதப்படுகிறது. தவெக-வின் எழுச்சி திமுக-வை விட அதிமுக-பாஜக கூட்டணிக்கே அதிக நெருக்கடியைத் தரும் என்பதால், தனது கூட்டணியை வலுப்படுத்தவும், சரிந்து வரும் செல்வாக்கை மீட்கவும் பாஜக மற்றும் அதிமுக தலைமைகள் தற்போது தீவிர ஆலோசனையில் ஈடுபட்டு வருகின்றனர்.