சூப்பர் ஸ்டார் ரஜினிகாந்த் தனது நீண்டகால திரையுலகப் பயணம், ஆன்மீகத் தேடல் மற்றும் அரசியல் பிரவேசம் குறித்த மர்மங்கள் அடங்கிய சுயசரிதையை எழுதி முடித்துள்ளார். அரசியலுக்கு வருவார் என பல தசாப்தங்களாக எதிர்பார்க்கப்பட்ட நிலையில், திடீரென உடல்நலத்தைக் காரணம் காட்டி அவர் ஏன் பின்வாங்கினார் என்பது குறித்த உண்மைகளை இந்தப் புத்தகம் வெளிச்சத்திற்குக் கொண்டு வரும் என்று எதிர்பார்க்கப்படுகிறது. இதற்காக அவர் மைசூரில் அமைதியான சூழலில் தங்கி, மிகுந்த கவனத்துடன் இந்தப் புத்தகத்தை உருவாக்கியுள்ளார்.
ரசிகர்களிடையே பெரும் எதிர்பார்ப்பை ஏற்படுத்தியுள்ள இந்தச் சுயசரிதையில், அவர் அரசியலில் இருந்து விலகத் தூண்டிய காரணங்கள், திரையரங்குகளில் சந்தித்த சவால்கள் மற்றும் அவரது வாழ்க்கையின் பல கசப்பான யதார்த்தங்கள் குறித்துத் தெளிவாகப் பதிவு செய்யப்பட்டுள்ளது. அவரது மகள் சவுந்தர்யா குறிப்பிட்டது போல, இது வெறும் சினிமா வாழ்க்கை வரலாறு மட்டுமல்ல, ஒரு சாதாரண மனிதன் சிகரத்தைத் தொட்ட பயணத்தை உலகிற்கு விளக்கும் காவியமாகும். ‘கூலி’ படப்பிடிப்பின் போதும் ரஜினி தீவிரமாக இந்தப் பணியில் ஈடுபட்டிருந்தது குறிப்பிடத்தக்கது.