வெடித்த வென்டிலேட்டர்… அசந்து தூங்கிய செவிலியர்கள்… தீயில் கருகிய மழலைகள்… வெட்டவெளிச்சமான அதிர்ச்சி உண்மைகள்… நெஞ்சை ரணமாக்கும் கொடூரம்…!!

அமராவதி மாவட்ட மகளிர் மருத்துவமனையின் பச்சிளம் குழந்தைகள் தீவிர சிகிச்சைப் பிரிவில் கடந்த ஆகஸ்ட் 24-ம் தேதி அதிகாலை 2:50 மணியளவில் வென்டிலேட்டர் வெடித்துச் சிதறியதில் மூன்று குழந்தைகள் பரிதாபமாக உயிரிழந்தனர். இந்த கோர விபத்து நிகழ்ந்தபோது, பணியில் இருந்த இரண்டு செவிலியர்கள் வரவேற்பறையில் அயர்ந்து தூங்கிக் கொண்டிருந்ததை உறுதிப்படுத்தும் சிசிடிவி காட்சிகள் தற்போது வெளியாகி பெரும் அதிர்ச்சியை ஏற்படுத்தியுள்ளன. விபத்து நடப்பதற்கு முன்பாகவே அபாய எச்சரிக்கை ஒலியும் சிவப்பு விளக்கும் மூன்று முறை தொடர்ந்து செயல்பட்டும் அவர்கள் விழித்தெழவில்லை. வெடிச்சத்தம் கேட்ட பிறகுதான் திடுக்கிட்டு எழுந்த அவர்கள், தாமதமாகத் தீயணைக்கும் கருவிகளைக் கொண்டு தீயைக் கட்டுப்படுத்த முயன்றது அந்த வீடியோ பதிவில் தெளிவாகப் பதிவாகியுள்ளது.

பணியாளர்களின் இந்த அலட்சியமான செயல்பாட்டால் ஏற்பட்ட பெருந்துயரம் கடும் கண்டனங்களுக்கு உள்ளாகியுள்ளது. அதிகாரப்பூர்வமாகத் தெரிவிக்கப்படும் தகவல்களுக்கும், களத்தில் உள்ள உண்மை நிலைக்கும் இடையே பல முரண்பாடுகள் இருப்பதாகக் சுட்டிக்காட்டியுள்ள காங்கிரஸ் மூத்த தலைவரும் முன்னாள் அமைச்சருமான டாக்டர் சுனில் தேஷ்முக், இது தொடர்பாகச் சுதந்திரமான விசாரணை நடத்தப்பட வேண்டும் என்று கோரிக்கை விடுத்துள்ளார். இதற்கிடையே, இச்சம்பவம் குறித்து விசாரிக்க அமைக்கப்பட்ட 11 பேர் கொண்ட உயர்மட்டக் குழு தனது முழுமையான அறிக்கையை மாநில அரசிடம் சமர்ப்பித்துள்ள போதிலும், அதன் விவரங்கள் இதுவரை பொதுமக்களின் பார்வைக்காக இன்னும் வெளியிடப்படவில்லை.