இந்தோனேசியாவில் 243 பயணிகளுடன் ஜாவா கடலில் சென்று கொண்டிருந்த ‘விர்கோ டிரான்ஸ்போர்ட் 8’ என்ற பயணிகள் கப்பல் திடீரென கட்டுப்பாட்டு அறையுடனான தொடர்பை இழந்து மாயமாகியுள்ள சம்பவம் சர்வதேச அளவில் பெரும் அதிர்ச்சியை ஏற்படுத்தியுள்ளது. சுமார் 17,000-க்கும் மேற்பட்ட தீவுகளைக் கொண்ட இந்தோனேசியாவில் விமானக் கட்டணத்தை விட கடல்வழிப் பயணம் மிகவும் மலிவானது என்பதால், பொதுமக்கள் மற்றும் சுற்றுலாப் பயணிகள் பலரும் இத்தகைய படகுப் போக்குவரத்தையே பெரிதும் நம்பியுள்ளனர்.
கிழக்கு ஜாவாவின் சுரபயா நகரத்திலிருந்து தெற்கு கலிமந்தானில் உள்ள பன்ஜார்மாசின் நகரை நோக்கி சனிக்கிழமை புறப்பட்ட இக்கப்பல், புறப்பட்ட சிறிது நேரத்திலேயே மோசமான வானிலையில் சிக்கியது. தொடர் புயல் மற்றும் சீற்றமான கடல் அலைகள் காரணமாக, இன்று அதிகாலை 2 மணியளவில் பன்ஜார்மாசின் துறைமுகத்திலிருந்து சுமார் 148 கிலோமீட்டர் தொலைவில் ஜாவா கடலில் பயணித்துக் கொண்டிருந்தபோது, கப்பலின் தொலைத்தொடர்பு சாதனங்கள் முழுமையாகச் செயலிழந்தன.
கப்பல் மாயமான தகவல் அறிந்தவுடன் இந்தோனேசிய தேடுதல் மற்றும் மீட்பு முகமை (BASARNAS) உடனடியாக மீட்புப் படைகளை ரெட் அலர்ட் நிலையில் களமிறக்கியது. கப்பல் கடைசியாகத் தொடர்பிலிருந்த கடல் பகுதியை மையமாகக் கொண்டு ஹெலிகாப்டர்கள் மற்றும் ரோந்துப் படகுகள் மூலம் தீவிரத் தேடுதல் வேட்டை முடுக்கப்பட்டுள்ளது. இதுவரை நடத்தப்பட்ட மீட்பு நடவடிக்கைகளில் 115 பயணிகள் பாதுகாப்பாக மீட்கப்பட்டுள்ள நிலையில், துரதிர்ஷ்டவசமாக ஒருவர் உயிரிழந்துள்ளதாக அதிகாரப்பூர்வமாக உறுதிப்படுத்தப்பட்டுள்ளது.
தற்போது வரை 125-க்கும் மேற்பட்ட பயணிகளின் நிலை என்னவென்று தெரியாததால், அவர்களை உயிருடன் மீட்கும் நோக்கில் சீற்றமான வானிலையையும் பொருட்படுத்தாமல் மீட்புக் குழுவினர் தொடர்ந்து போராடி வருகின்றனர். இந்தோனேசியாவில் முறையான பாதுகாப்பு விதிமுறைகள் மற்றும் பராமரிப்புத் தரநிலைகள் கடுமையாகப் பின்பற்றப்படாததே இதுபோன்ற தொடர்ச்சியான கடல் விபத்துகளுக்குக் முக்கியக் காரணம் எனச் சமூக ஆர்வலர்கள் குற்றம் சாட்டி வருகின்றனர்.