மும்பை விமான நிலையத்தில் முன்னாள் இந்திய கிரிக்கெட் அணியின் கேப்டன் எம்.எஸ். தோனி மற்றும் அவரது குடும்பத்தினர், விமான நிறுவன ஊழியர் ஒருவரால் அவர்களின் அனுமதியின்றி ரகசியமாக வீடியோ எடுக்கப்பட்ட சம்பவம் சமூக ஊடகங்களில் கடும் கண்டனங்களை எழுப்பியுள்ளது. இன்ஸ்டாகிராமில் வைரலாகி வரும் அந்த வீடியோவில், தோனி, அவரது மனைவி சாக்க்ஷி மற்றும் மகள் ஜிவா ஆகியோர் விமானத்தை நோக்கி நடந்து செல்லும்போது, அங்கிருந்த ஊழியர் ஒருவர் ஏரோபிரிட்ஜிற்குள் (aerobridge) மறைந்திருந்து அவர்களை ரகசியமாகப் படம் பிடித்துள்ளார். பொதுப் பகுதிகளில் ரசிகர்கள் எடுக்கும் சாதாரண வீடியோக்களைப் போலல்லாமல், பாதுகாப்புப் பிராந்தியத்திற்குள் கடமையில் இருந்த ஊழியர் ஒருவரே இவ்வாறு சட்டம் மற்றும் ஒழுங்கை மீறிச் செயல்பட்டிருப்பதுதான் இந்த விவகாரத்தைப் பெரிதாக்கியுள்ளது.
https://www.instagram.com/p/DaSrhpgiq9z/?utm_source=ig_embed&utm_campaign=embed_video_watch_again
இந்தச் சம்பவம் பயணியரின் தனிமனித உரிமையைப் பறிக்கும் செயல் என நெட்டிசன்கள் பலரும் தங்களது ஆதங்கத்தை வெளிப்படுத்தி வருகின்றனர். பிரபலமாக இருந்தாலும் சரி, சாமானியராக இருந்தாலும் சரி, பயணிகளின் பாதுகாப்பையும் தனிப்பட்ட சுதந்திரத்தையும் காப்பது விமான நிறுவன ஊழியர்களின் முக்கியப் பொறுப்பாகும் எனப் பலரும் சுட்டிக்காட்டியுள்ளனர். மைதானத்திற்கு வெளியேயும் பொது இடங்களிலும் எப்போதும் அமைதியையும், தனிமையையும் விரும்பும் தோனி போன்ற ஒருவருக்கே இந்த நிலை ஏற்பட்டிருப்பது ரசிகர்களிடையே பெரும் ஏமாற்றத்தை ஏற்படுத்தியுள்ளதுடன், சம்பந்தப்பட்ட ஊழியர் மீது கடுமையான ஒழுங்கு நடவடிக்கை எடுக்கப்பட வேண்டும் என்ற கோரிக்கையையும் வலுக்கச் செய்துள்ளது.