இந்தியாவில் சாலை விபத்துகள் மற்றும் அதனால் ஏற்படும் உயிரிழப்புகளின் எண்ணிக்கை ஆண்டுதோறும் கவலையளிக்கும் வகையில் அதிகரித்து வருகிறது. மக்களவையில் காங்கிரஸ் எம்பி பென்னி பெஹனான் எழுப்பிய கேள்விக்கு மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி அளித்த எழுத்துப்பூர்வ பதிலின்படி, நாட்டில் 2025-ஆம் ஆண்டில் சாலை விபத்து மரணங்கள் 1,83,382 ஆக உயர்ந்துள்ளன. இது 2024-ஆம் ஆண்டில் பதிவான 1,77,175 மரணங்களுடன் ஒப்பிடுகையில் 3.5% கூடுதலாகும். மேலும், நாட்டின் மொத்த விபத்துகளின் எண்ணிக்கை 5.3% உயர்ந்து 5,13,563 ஆகப் பதிவாகியுள்ளது. கடந்த 2015-ஆம் ஆண்டில் பதிவான 1,46,133 உயிரிழப்புகளுடன் ஒப்பிடும்போது, கடந்த பத்தாண்டுகளில் இந்தியாவில் சாலை விபத்து மரணங்கள் 25.5% வரை அதிகரித்திருப்பது சாலைப் பாதுகாப்பின் அவசியத்தை உணர்த்துகிறது.
மாநில அளவிலான புள்ளிவிவரங்களைப் பார்க்கும்போது, உத்தர பிரதேசத்தில் சாலை விபத்து மரணங்கள் மிகக் கடுமையாக உயர்ந்துள்ளன; அங்கு உயிரிழப்புகள் 24,118-லிருந்து 27,550 ஆக அதிகரித்துள்ளது கவனிக்கத்தக்கது. இதேபோன்று பீகார், மகாராஷ்டிரா மற்றும் குஜராத் ஆகிய மாநிலங்களிலும் உயிரிழப்புகள் உயர்ந்துள்ளன. அதேவேளையில், சில மாநிலங்களில் விபத்து மரணங்களைக் குறைப்பதில் சாதகமான மாற்றங்கள் ஏற்பட்டுள்ளன. குறிப்பாக, பஞ்சாப்பில் சாலை விபத்து மரணங்கள் 4,759-லிருந்து 3,062 ஆகக் கணிசமாகக் குறைந்துள்ளன. பஞ்சாப்பைத் தவிர சத்தீஸ்கர், கர்நாடகா, தெலங்கானா மற்றும் டெல்லி ஆகிய மாநிலங்களிலும் உயிரிழப்புகளின் எண்ணிக்கை குறிப்பிடத்தக்க அளவில் சரிவைக் கண்டுள்ளது.