மேற்கு ஆசிய (மத்திய கிழக்கு) நாடுகளில் நிலவி வரும் தீவிரமான போர்ச் சூழல் மற்றும் அரசியல் பதற்றங்களுக்கு மத்தியில், இந்தியா தனது கச்சா எண்ணெய் தேவைகளுக்காக ரஷ்யாவை பெருமளவில் நம்பியிருக்கத் தொடங்கியுள்ளது. உக்ரைன் போர் தொடங்கிய காலகட்டத்தில் இந்தியாவுக்கு மலிவு விலையில் தள்ளுபடி வழங்கி வந்த ரஷ்யா, தற்போது இந்தச் சூழ்நிலையைப் பயன்படுத்திக் கொண்டு தள்ளுபடி முறையை அதிரடியாக ரத்து செய்துள்ளது. அதற்குப் பதிலாக, கூடுதல் ‘பிரீமியம்’ கட்டணம் வசூலிக்கும் புதிய முறையை அமல்படுத்தி வருவது சர்வதேச பொருளாதார அரங்கில் பெரும் பரபரப்பை ஏற்படுத்தியுள்ளது.
மத்திய வர்த்தகம் மற்றும் தொழில்துறை அமைச்சகம் வெளியிட்டுள்ள தரவுகளின்படி, கடந்த மார்ச் மாதத்தில் 158.5 லட்சம் டன்னாக இருந்த இந்தியாவின் ஒட்டுமொத்த கச்சா எண்ணெய் இறக்குமதி, ஏப்ரல் 2026-ல் 23% அதிகரித்து 195.3 லட்சம் டன்னாக உயர்ந்துள்ளது. உலக சந்தையில் கச்சா எண்ணெய் விலை கடுமையாக உயர்ந்ததால், இந்தியாவின் ஒட்டுமொத்த இறக்குமதி பில் (Import Bill) ஒரே மாதத்தில் 61.3% அதிகரித்து 15.4 பில்லியன் டாலராக எகிறியுள்ளது. இதில் இந்தியாவின் ஒட்டுமொத்த எண்ணெய் தேவையில் ரஷ்யாவின் பங்கு 11 மாதங்களில் இல்லாத அளவுக்கு உச்சத்தைத் தொட்டுள்ளது குறிப்பிடத்தக்கது.
இந்த விலையேற்றத்தில் அதிர்ச்சியூட்டும் விஷயம் என்னவென்றால், ரஷ்யா தனது கூடுதல் பிரீமியம் தொகையை ஒரே மாதத்தில் 425% வரை உயர்த்தியுள்ளது. ஏப்ரல் மாதத்தில் மற்ற நாடுகளிடமிருந்து வாங்கிய கச்சா எண்ணெய்யின் சராசரி விலை ஒரு டன்னுக்கு $787.1 ஆக இருந்த நிலையில், ரஷ்ய எண்ணெய்க்கு இந்தியா ஒரு டன்னுக்கு $864.9 செலுத்தியுள்ளது. அதாவது, மற்ற நாடுகளை விட ரஷ்யாவிற்கு ஒரு டன்னுக்கு கூடுதலாக $77.8 பிரீமியம் தொகை கொடுக்கப்பட்டுள்ளது. மார்ச் மாதத்தில் இந்த கூடுதல் பிரீமியம் தொகை வெறும் $14.8 ஆக மட்டுமே இருந்தது என்பது குறிப்பிடத்தக்கது.
ரஷ்யாவிடமிருந்து இந்தியா அதிகளவில் எண்ணெய்யை வாங்கிய அதே வேளையில், அமெரிக்காவிடமிருந்து வாங்கும் கச்சா எண்ணெய்யின் அளவு கடந்த 8 மாதங்களில் இல்லாத அளவுக்கு மிகக் குறைந்த அளவாகச் சரிந்துள்ளது. மேற்கு ஆசியப் பதற்றத்தை சாதகமாக்கிக் கொண்டு ரஷ்யா விலையைக் கடுமையாக உயர்த்தினாலும், இந்தியாவின் மொத்த இறக்குமதியில் 34.3% ரஷ்யாவிடமிருந்தே பெறப்படுகிறது. வேறு வழியின்றி இந்தியா ரஷ்யாவையே தொடர்ந்து சார்ந்து இருப்பது இந்தியப் பொருளாதாரத்திற்குப் பெரும் சுமையாக மாறியுள்ளதால், இதற்கான மாற்று ஏற்பாடுகளை இந்தியா விரைவில் செய்ய வேண்டும் என்பதே பொருளாதார வல்லுநர்களின் கருத்தாக உள்ளது.