“அமைச்சர் எ.வ.வேலுவின் நண்பர் வீட்டில் விடிய விடிய சோதனை”…. தேர்தலில் வெடிக்கப்போகும் அடுத்த குண்டு….!

திருவண்ணாமலை மாவட்டத்தைச் சேர்ந்த அமைச்சர் எ.வ.வேலுவுக்கு நெருக்கமானவர்கள் எனக் கருதப்படும் நபர்களின் வீடுகள் மற்றும் வணிக நிறுவனங்களில் வருமான வரித்துறையினர் அதிரடி சோதனையில் ஈடுபட்டுள்ளனர். குறிப்பாக, தொழிலதிபர் கமல்சந்த் ஜெயினுக்குச் சொந்தமான இடங்கள் மற்றும் கட்டுமான நிறுவனங்களில் இரவு முழுவதும் இந்தச் சோதனைகள் நீடித்தன. தமிழகத்தில் வரும் ஏப்ரல் 23-ஆம் தேதி சட்டசபை தேர்தல் நடைபெறவுள்ள நிலையில், வாக்காளர்களுக்குப் பணம் மற்றும் பரிசுப் பொருட்கள் விநியோகம் செய்யப்படுவதைத் தடுக்கும் நோக்கில் இந்த நடவடிக்கை மேற்கொள்ளப்பட்டு வருகிறது.

இந்தச் சோதனையானது திருவண்ணாமலை மட்டுமின்றி சென்னை, கோவை, திருப்பூர், திருச்சி மற்றும் சேலம் என தமிழகம் முழுவதும் சுமார் 40-க்கும் மேற்பட்ட இடங்களில் ஒரே நேரத்தில் தொடங்கியது. தேர்தல் நேரத்தில் வாக்காளர்களுக்கு வழங்குவதற்காக வேட்டிகள் மற்றும் சேலைகள் பெருமளவில் தயார் செய்யப்படுவதாகக் கிடைத்த ரகசியத் தகவலின் அடிப்படையில், முன்னணி ஜவுளி நிறுவனங்கள் இலக்கு வைக்கப்பட்டுள்ளன. சேலம் ஆத்தூர் பகுதியில் உள்ள திமுக பிரமுகர்களுக்குத் தொடர்புடைய நிதி நிறுவனங்களிலும், தஞ்சாவூர் மற்றும் கும்பகோணத்தில் உள்ள பிரபல ஜவுளி கடைகளிலும் அதிகாரிகள் தீவிர ஆய்வுகளை மேற்கொண்டனர்.

சோதனையின் போது அசம்பாவிதங்களைத் தவிர்க்க மத்திய தொழில்துறை பாதுகாப்புப் படையினர் (CISF) பாதுகாப்புப் பணியில் ஈடுபடுத்தப்பட்டனர். பல இடங்களில் சோதனையின் போது வாடிக்கையாளர்கள் உள்ளே அனுமதிக்கப்படவில்லை. இந்த அதிரடி நடவடிக்கையில் கணக்கில் வராத பணம், முக்கிய ஆவணங்கள் மற்றும் கணினித் தரவுகள் பறிமுதல் செய்யப்பட்டுள்ளதாகத் தெரிகிறது. தேர்தல் ஆணையத்தின் பறக்கும் படைகளும் வருமான வரித்துறையும் இணைந்து மேற்கொண்டுள்ள இந்த நடவடிக்கை, அரசியல் வட்டாரத்தில் பெரும் பரபரப்பை ஏற்படுத்தியுள்ளது.