”போரை முடிச்சுக்கலாம்னு இருக்கேன்”… “ட்ரம்ப்பின் திடீர் ட்வீட்!”… மத்திய கிழக்கு போரில் திடீர் திருப்பம்..!!

சர்வதேச சந்தையில் நிலவி வரும் கச்சா எண்ணெய் தட்டுப்பாட்டைச் சீர்செய்யும் நோக்கில், ஈரான் மீதான பொருளாதாரத் தடைகளை அமெரிக்கா அதிரடியாகத் தளர்த்தியுள்ளது. ஹார்முஸ் ஜலசந்தி மூடப்பட்டதால் உலகளவில் எண்ணெய் விநியோகம் பாதிக்கப்பட்ட சூழலில், மார்ச் 20-ஆம் தேதிக்கு முன்பாகக் கப்பல்களில் ஏற்றப்பட்ட ஈரானிய கச்சா எண்ணெய் மற்றும் பெட்ரோலியப் பொருட்களை ஏப்ரல் 19 வரை விற்பனை செய்துகொள்ள அமெரிக்கா அனுமதி அளித்துள்ளது. இதன் மூலம் சுமார் 140 மில்லியன் பேரல் கச்சா எண்ணெய் உடனடியாகச் சந்தைக்கு வரும் என்பதால், சர்வதேச அளவில் நிலவும் தற்காலிகப் பொருளாதார அழுத்தம் குறையும் என்று எதிர்பார்க்கப்படுகிறது.

மறுபுறம், மத்திய கிழக்கு பிராந்தியத்தில் நிலவும் போர்ச் சூழல் குறித்து அதிபர் ட்ரம்ப் தனது நிலைப்பாட்டை வெளிப்படுத்தியுள்ளார். சவுதி அரேபியா மற்றும் இஸ்ரேல் மீது ஈரான் ட்ரோன் மற்றும் ஏவுகணைத் தாக்குதல்களைத் தீவிரப்படுத்தியுள்ள நிலையிலும், ஈரானுக்கு எதிரான ராணுவ நடவடிக்கைகளைக் குறைப்பது குறித்து அமெரிக்கா பரிசீலித்து வருகிறது. “நாங்கள் இலக்கை நெருங்கிவிட்டோம்” என்று குறிப்பிட்டுள்ள ட்ரம்ப், ஹார்முஸ் ஜலசந்தியைப் பயன்படுத்தும் மற்ற நாடுகள் தங்களின் பாதுகாப்பைத் தாங்களே கவனித்துக்கொள்ள வேண்டும் என்றும், அமெரிக்காவிற்கு அதில் நேரடித் தேவை இல்லை என்றும் அதிரடியாகத் தெரிவித்துள்ளார்.

வெள்ளை மாளிகையின் தகவல்படி, ஈரானுக்கு எதிரான ராணுவ நடவடிக்கைகள் திட்டமிட்டபடி மிகச் சிறப்பாகச் செயல்பட்டு வருகின்றன. ஈரானிய ஆட்சியின் அச்சுறுத்தும் திறன் கணிசமாகக் குறைக்கப்பட்டுள்ளதாகவும், இன்னும் 1 முதல் 3 வாரங்களுக்குள் இந்த நடவடிக்கைகள் முழுமையாக நிறைவடையும் என்றும் பென்டகன் கணித்துள்ளது. கச்சா எண்ணெய் விநியோகத்தில் தளர்வு அளிக்கப்பட்டாலும், ஈரானின் ராணுவ ரீதியான செயல்பாடுகளை முடக்குவதில் அமெரிக்கா உறுதியாக இருப்பதை அதிபர் ட்ரம்ப் மற்றும் வெள்ளை மாளிகைச் செயலாளரின் பதிவுகள் உறுதிப்படுத்துகின்றன.