சமூக ஊடகங்களில் பரவி வந்த தனது விவாகரத்து மற்றும் கர்ப்பம் குறித்த வதந்திகளுக்கு நடிகை திவ்யா அகர்வால் முற்றுப்புள்ளி வைத்துள்ளார். தனது இன்ஸ்டாகிராம் பக்கத்தில் இருந்து திருமண புகைப்படங்களை அவர் நீக்கியதைத் தொடர்ந்து, அவருக்கும் அவரது கணவர் அபூர்வா பத்காவன்கருக்கும் இடையே கருத்து வேறுபாடு ஏற்பட்டு பிரியப் போகிறார்கள் என்ற செய்திகள் பரவலாகப் பேசப்பட்டன. இதற்கு விளக்கமளித்த திவ்யா, தான் தனது கணவருடன் மகிழ்ச்சியாக வாழ்ந்து வருவதாகவும், தேவையில்லாமல் பரப்பப்படும் வதந்திகளை மக்கள் நம்ப வேண்டாம் என்றும் கேட்டுக் கொண்டுள்ளார்.
தனது இன்ஸ்டாகிராம் பக்கத்தில் இருந்து சுமார் 2500 பழைய பதிவுகளை நீக்கியதாகக் குறிப்பிட்ட திவ்யா, ஊடகங்கள் தனது தொழில்முறை சார்ந்த மாற்றங்களை கவனிக்காமல், திருமண புகைப்படங்களை நீக்கியதை மட்டுமே பெரிய விஷயமாக மாற்றிவிட்டதாகக் குற்றம் சாட்டியுள்ளார். மக்கள் தன்னிடம் இருந்து எப்போதும் ஏதாவது ஒன்றை எதிர்பார்ப்பது வேடிக்கையாக இருக்கிறது என்று கூறிய அவர், தற்போது இணையத்தில் பேசப்பட்டு வருவது போல தனக்கு விவாகரத்தோ அல்லது தான் கர்ப்பமாகவோ இல்லை என்பதை மிகவும் தெளிவுபடுத்தியுள்ளார்.
தற்போது எல்லாவற்றையும் கடந்து தங்களது வாழ்க்கை மிகவும் அமைதியாகவும் மகிழ்ச்சியாகவும் சென்று கொண்டிருப்பதாக அவர் தெரிவித்துள்ளார். அனைத்து திரைப்படங்களும் ஒரு சுமுகமான சுபமுடிவை (Happily ever after) எட்டுவது போல, கடவுளின் அருளால் தங்களது திருமண வாழ்க்கையும் சிறப்பாக உள்ளது என்றும், வதந்திகள் பரப்பப்படும் அதே வேளையில் தனது கணவர் தனக்கு அருகிலேயே நிம்மதியாக உறங்கிக் கொண்டிருக்கிறார் என்றும் நெகிழ்ச்சியுடன் பகிர்ந்து இந்த வதந்திகளுக்கு அவர் முற்றுப்புள்ளி வைத்துள்ளார்.